絲絲講場：讀書愈少愈鍾意炒股？
中國股民數量突破1.2億戶！深交所同上交所公布舊年股民數據，絲絲發現除咗30歲以下嘅股民生力軍大幅增加之外，原來學歷愈低嘅股民愈鍾意炒股，有分析話可能因為高學歷人士工作繁忙，唔得閒日日望住個市，寧願買基金喎！
內地36%股民係後生仔
截至去年底，中國股民數目達到1.2036億戶，當中99.16%為A股帳戶，其餘為B股帳戶，若以內地13億人口粗略計算，即係大約每9個人就有1個係股民！當中30歲以下股民佔比最多，達到36%，反而隨着年齡增長，炒股嘅人愈少。
數據仲發現，中專或以下學歷嘅股民數目佔比超過一半，學歷愈高反而炒股意欲就愈細，碩士或以上高學歷股民佔比只有不足4%。有業內人士話高學歷嘅人會更有自信，願意透過自己學識、工作賺取回報，而低學歷人士就希望透過炒股獲得額外收入。另一個解釋就係高學歷人士工作節奏繁忙，無空閒時間打理股票，索性買基金同信託產品。
絲絲就認為，數據都可以解釋點解內地股民鍾意短炒，某程度都同學歷佔比有關！
余絲韻