孖妹S檔案：4套投資法潮爆股壇
「走在時代嘅尖端」向來都位列孖妹語錄頭十位，我哋髮型要至Hit，一身行頭要至潮，連包包都要至新，唯獨喺缸湖行走嘅投資方法係唔理新舊，最緊要夠Work夠爆！其實股海上流傳唔少大熱投資法，有啲個名仲好無厘頭添，唔知你又夠唔夠膽用？
巴：投資網誌作家 巴黎
梁：浩邦金融董事 梁彥穎
何：交通銀行經濟及策略師 何文俊
水車投資法睇PE減注
彩兒：「水車投資法」可以幫「十五、十六」嘅投資者決定注碼，喺股市市盈率（PE）約8至12倍時，投入全部資金進入市場；喺12至16倍時，只投入七成資金；喺16至20倍時，就只用五成資金；最後，高於20倍時就只投入三成資金。
梁：佢都算係懶人投資法，方便易用，但只適用於已發展及成熟嘅市場，如果想套用喺非洲市場就實唔Work啦！另外，使用時須分析一籃子股票或大市，範疇要夠廣泛性先好用，建議因應以上情況投資基金或交易所買賣基金（ETF）。
我哋其實可以將方法改良，例如在大市處於12至16倍PE時，將閒置嘅三成資金買入債券基金或敍造定期，去博賺更高回報。不過呢個方法有漏洞。低PE或者代表公司就快執笠，未必一味代表平！而且呢個方法喺升市或股價飆緊嗰陣一路減持，暗示睇淡大市，一旦遇上大升市就賺得唔多。
反向投資博獨贏Alpha
彩兒：反向投資法（Contrarian Investing）即係「市場做東，我做西」，市場一有共識時，就要搵市場嘅盲點，然後反其道而行，並靠Alpha值「食胡」，賺取高回報。
何：無錯！投資市場上嘅贏家往往只係一小撮人，多數大部分人睇好嘅投資唔會實現爆升，如果唔係咪全世界都唔使做？即使港股○七年暴漲，大部分人賺到錢，但其後金融海嘯都輸番晒。正因係大部分人嘅共識，喺個人睇法得到認同下，就會加強及確信自己嘅觀點，容易出現盲點。例如喺牛市三期，連街市賣菜嘅大嬸都同你同邊，就知道快出事。
Kitty：近年嘅大眾觀點真係冇次靈，舊年多家金融機構因應預期美國收水同憧憬即將加息而大唱「棄債從股」，但係舊年債市表現「靚仔」到令市場一地眼鏡碎。
何：要用反向投資法，首先搵到市場共識、再睇論據係咪成立、留意觀點有乜漏洞及盲點，一旦確信出現盲點就可做相反操作。由於持相反理論，入市成本通常較低，以期權嚟講，更有機會出現折讓，而且喺投資初期多數係刀仔鋸大樹，隨後確立睇中市先加碼，所以風險控制自然好啲。
不過，唔係個個都啱使，最緊要性格要夠「八卦」同大膽。再者，目光一定要夠宏觀，唔可以滿足於睇大路經濟數據，最好自命清高，至憎人云亦云，亦都唔可以一味識計數，需跨界別睇政治、國際關係、軍事、科技發展等因素，大可用看娛樂版嘅心情睇國際版同時事版，相信散戶都可脫穎而出。
牛眼投資法「一擊即中」
Kitty：諗起讀書時要解剖牛眼就怕怕！點估到原來有「牛眼投資法」（Bull's Eye Investing）？佢源自投資大師莫爾丁（John Mauldin）嘅手筆，有標靶嘅意思，目標係「一擊即中」可大賺1倍以上嘅「牛眼股」。
彩兒：個方法第一步係要學創投基金投資，除結合股價走勢同基礎分析，仲要了解市場方向、經濟周期、國際大勢、產業前景等；之後就要精選潛力二線股，目光放眼在未來3個月至半年內嘅股價變化，仲要訂立15至20%嘅止蝕比率。
巴：呢套方法可以幫我把握更多市場機會，佢講求「一擊即中」，即係意味要捕捉股價催化劑，避免「坐艇」。另外嘅重點仲有嚴守止蝕位、夠耐性、設目標利潤、分散投資、唔投機，更重要嘅係唔同股票談戀愛！
想捕捉爆升機會，就要捉市場心理。經歷熊市嘅投資者經常Underreact（反應乏力），經歷牛市嘅投資者取態就會相反。例如，一間企業喺熊市中連取幾季佳績，但市場Underreact，咁就要留意投資機會喇。我舊年四月留意到滬港通即將開通嘅市場催化劑，加上內地投資者嘅Underreact，就喺內地開戶，將原有嘅建行（00939）H股轉做A股，之後見H股有折讓，就重投H股懷抱，累計賺幅達到七成。
「CANSLIM」七合一選股
Kitty：我以前仲以為「CANSLIM」係減肥食品添！原來「CANSLIM投資法」係知名成長型投資大師威廉˙奧尼爾（William J O'Neil）創立，包含7項成長股嘅選股法則。
梁：係啊，唔好成日掛住減肥啦！「C」係代表目前季度盈利，優質股飆升前的按年相關增長通常逾20%；「A」係年度每股盈利增長，須選出現按年有增長的股份，連續3年增長就至正，同時股本回報率（ROE）須維持在17%以上；「N」指嘅係新產品、新管理等新氣象，屬大升前先兆。
至於「S」即流通股數，旨在揀「盤細」博容易爆升；「L」即係專揀龍頭股或強勢股；「I」就係得到機構投資者支持；最後「M」係市場大勢，要搵配合大勢嘅股份，符合5項要求就係入市訊號。
巴：我對CANSLIM投資法可以話係一見傾心，呢隻投資法同我至愛嘅價值投資法，就好似同出一轍咁。如果留意到股份有條件「C」，即係目前季度盈利按年增長逾20%，而市場上投資者卻缺乏反應，就可能係買入嘅最好時機；至於條件「N」，即係新氣象，一啲合併或分拆嘅企業可將內在價值提升，佢都好合理。再講條件「S」喇，以建行為例子，A股發行股數與H股股數比例係1比26，所以A股升幅高於H股絕對有原因。
梁：不過，佢咁多條件，其中有啲又量化唔到，好難跟足嚟做篩選，仲有機會高追添！其中條件「I」話要得到機構投資者支持，我覺得有時基金持貨太多未必係好事，管理層持貨太少就會喺無壓力下做嘢，甚至有機會Hea住做，所以整個管理層累計持股比例最理想係唔少過三成。
CANSLIM投資法的選股條件
C ─ 目前季度盈利按年增長逾20%（Current quarterly earnings per share）
A — 具年度每股盈利增長（Annual earnings increases）
N — 具新產品、新管理及創新高（New Products, new management, new highs）
S — 流通股數少（Supply and demand）
L — 選龍頭股或強勢股（Leader or laggard？）
I — 機構投資者的支持（Institutional sponsorship）
M — 可配合市場大勢（Market direction）
William J O'Neil
Kitty & 彩兒
若有料報畀彩兒同Kitty或有嘢問，可電郵money.biz@on.cc