Market Insight：和黃執平貨有後着

個市能夠好似過山車咁，先俯衝再升凸，仲有人行近一年來首次進行七日期逆回購放水，以及歐洲央行一如所料，落實終極放水措施，以每個月600億歐元的銀彈直接買入歐元區國家債券，實行進一步壓低長息，刺激經濟及通脹回升，當中亮點，除了歐央行拍晒心口，講明量寬規模及時間可以有得傾，話泵水計劃會一直延至歐元區達到2%通脹目標為止。

睇見歐央行咁講，古勝真係有啲心寒，比歐央行更早出招，連續推出三輪QE的美國，死谷爛谷，通脹都係一一年回光反照，平均掂一掂3.2%之後（因為就業市場未得，所以當時無從量寬退出），之後幾年隨住QE威力出現邊際遞減，一二年開始通脹得2.1%、1.5%及1.6%。

古勝冇點你

萬里長空

全球游資續氾濫

今日歐洲情況比美國複雜得多，部分底子差的成員國好似西班牙，失業率高達就業人口四分一，要成員遵守財政紀律，唔畀政府增加開支，反而勒緊褲頭，歐央行先肯出手買債，咁嘅情況可以唔可推到足夠通脹令央行有機會回歸正常財政政策？在下就相當懷疑。珠玉在前，美國經歷三次QE，儘管經濟逐漸見起色，但副作用相當大，推高全球資產價格及債市去到史無前例的水平。

雖然今日美國有條件逐漸退出量寬，但美金瘋狂回升，對出口企業的影響今年會逐步浮面，近期美債息愈玩愈縮，落到2厘樓下，可見債商對美國未來可以加息的空間，已不敢存有幻想。

在日本及歐央行加入晒冷，瘋狂擴大資產負債表救經濟的遊戲下，全球游資充裕情況比○九至一三年聯儲局全速開動印鈔機時，恐怕有過之而無不及。唔少人一直預期美國退市會令資產泡沫漏氣（例如我哋班金管局大員），恐怕短期內都好難發生，今年中國會唔會加入鬥泵錢的貨幣戰爭？對股市投資者而言，看來是值得期待。

今浪有條件突破

人行逆回購，加上歐央行水浸全球，上周港股坐過山車一樣，周一急跌後連升四日，累積一周升746點收報24,850點。上周五晚歐股繼續沉醉於QE的消息，但美股見獲利回吐，但整體格局，個人認為現時港股是近年最有條件升穿兩萬五上落區頂部的一刻，每次回吐都是衝浪的良機。

提出進行大型重組的長和系，以為呢排會一動不如一靜，等股東投票，勢估唔到仲繼續四圍去「濕平」 ，先係長建（01038）批完股轉頭用120億元收購英國鐵路公司，上周股價創63.1元的歷史新高。轉 個頭和黃（00013）在電訊項目中加碼，向西班牙電訊收購英國附屬公司O2，作價92.5億英鎊，相當於1,075億港元。交易之後，和黃在英國流動電訊市場佔有率，將會由第四一次過跳升至第一位。

單係睇見近大半年，英鎊跟住歐元一齊跌，上周歐央行再推QE，英鎊大半年貶值近一成三，時機與匯水角度，都應該買得唔貴。事實上，西班牙電訊○六年用咗177億英鎊買下O2，今次因為要減債賤賣，比購入價勁減四成二，真係趁佢病攞佢命之舉。

今次作價約等於8倍EV/EBITDA，同去年英國BT買EE時差唔遠，不過今次交易，和黃3英國將手執行業牛耳，咁睇交易就顯得抵，而且交易之後，連同BT的EE及Vodafone，英國流動電訊市場經營者由四變三，少隻香爐少隻鬼，競爭少咗，加埋同和黃3英國合併後節省成本，提升效益的好處會逐漸浮現。

回報穩定惹追捧

從和黃及長建連串收購動作，多少都反映歐洲經濟疲弱底下，提供了唔少價值被低估的投資機會，難怪吸引善長透過收購合併提升股東價值的超人去執平貨。

隨住智能手機的價格更為大眾化，滲透率上升，數據使用愈趨普及，依家唔少人漏咗手機無帶出街，仲比無帶銀包響身更不安，電訊股同以往高投入低回報時好唔同，漸漸變成收入穩定的公用、基建股的角色，如果超低息環境持續，固定回報資產愈來愈貴，電訊資產跑出便不叫人意外。君可見近期基金狂買中移（00941），可見市場先生的取態。

古勝