絲絲講場：日本城撈多瓣賺OL錢
國際家居（01373）大家識唔識？咪即係日本城囉！佢哋今期轉玩Sell精品同飾物，副主席魏麗霞（Lisa）話，希望吸引多啲年輕女仔客。唔通佢哋想由十蚊店「升呢」做港版Accessorize？
擬開九店 日韓入貨
Lisa話上個月用咗950萬收購咗間連鎖精品店，下個月會喺香港仔開兩間新店，每間資本開支約40萬，係會貴過平均開店嘅使費。
佢好坦白話，因為成本貴咗，都拖慢新店平均回本期。總共打算開9間呢類店舖，估計下個財政年度會有收入貢獻咁話。
點解做做吓家品走去賣飾物？因為Lisa都係貪靚囉，佢話人哋Accessorize全世界都有，做得咁有規模，好想好似佢吔咁。加上佢話內地都好多連鎖飾物店，係香港未有個咁嘅牌子，通常都係手作仔舖多。遲吓都入多啲日本同韓國貨，盡量新啲去貨快啲，相對平均每張單都做多啲。即使開呢個新業務好似拖慢回報期，不過佢相信長遠都有好處。
佢仲話，未來都仲會搵收購同投資機會，又話唔排除做番十蚊店。
余絲韻