外電報道，對沖基金Canarsie Capital喺去年三月份管理嘅資產規模約有1億美元，但基金經理Owen Li依家竟然同眾多投資者講，佢為自己喺過去3個星期內嘅「過度積極」投資策略感到「非常遺憾」，原因係，目前基金規模只係蝕淨20萬美元，即係輸咗99.8%！Owen向一眾客仔道歉，並話會負上全責。
Owen又解釋，當時佢因為睇好股市走向，同埋好想追番上年十二月投資差勁所蝕咗嘅損失，結果喺過去3周，股票期權押錯注，錄得更大嘅損失。
唉，講到呢度，絲絲都覺得班投資者陰功豬。大嗱嗱9千9百幾萬美元喎，一句Sorry又點會彌補到投資者嘅損失。不過，原來Owen已經唔係第一次行衰運。之前佢喺另一間投資公司Galleon Group度做過，點知呢間公司嘅老闆因為涉及非法活動而被判入獄，依家呢間公司已經執咗笠。雖然犯法嗰個唔係佢，但點睇佢都係有「佗衰家」嘅嫌疑。
余絲韻