今個月中，瑞士法郎同歐元脫鈎，當堂嚇窒個匯市，交易商同埋投資者都慌忙應對，破天荒喺45分鐘內做咗超過9萬億美元嘅交易結算，交易商壓力之大可想而知。驚魂未定，歐央行終於喺周四晚開會就量寬定案，交易商今次嚴陣以待，準備成晚捕住議息結果，唔通唔驚匯市又有大動盪咩！
歐洲央行「放水」成為環球金融市場焦點，香港銀行亦密切注視，有銀行財資部人士稱，炒房對歐央行即將公布的量化寬鬆（QE）措施嚴陣以待，負責貨幣交易（Currency Desk）的日更同事全部留守，直踩至美國交易時段。
他續指，環球金融市場動盪時，炒房同事都會留守「睇住自己個盤」，即使離開崗位收工，仍然會繼續留低限價盤指令，以防市場突然再現大幅波動，上一次出現類近的緊張情緒為不久前嘅瑞郎脫歐事件，至於是次歐洲央行清晰的「放水」行動更不敢怠慢。
上次因瑞郎脫歐而慘蝕的國際知名外匯商福匯就通知客戶，今日收市後，該公司將把美元/離岸人民幣及美元/港元的保證金要求提高，詳情請查閱電郵或者致電該公司咁話。福匯呢次瑞郎一役好在有母公司注資打救，家陣咁做可理解，見過鬼都怕黑啦！
本地外匯商都唔例外，好似新鴻基外匯咁，聽聞佢哋嘅交易員都要(目及)實歐央行議息結果，不過班客戶都算平靜，未見有好多客戶查詢，事關客戶都有自己睇法！同埋上次瑞郎脫歐事出突然，今次歐央行議息結果應該不會搞到上次咁混亂！
余絲韻