絲絲講場：華峰小加飯釋前嫌
如果大家唔係太善忘，應該記得年前立法會議員張華峰同港交所（00388）行政總裁李小加曾喺飯局中因減報價機收費一事而鬧翻，仲搞到要港交所主席周松崗做和事老！雖然兩人之後曾經喺鏡頭前握過手，但隔空針鋒相對仍不時見到。
Call齊業界大陣仗
不過，個世界始終係圓嘅，事隔差唔多兩年，張華峰同李小加終於「破冰」，張議員尋晚安排十個金融業界組織同小加總裁「世紀飯局」，係上次飯局不歡而散以來嘅首次。
尋晚呢場「大龍鳳」，Call齊十個會，差唔多有成四十人出席。飯局有兩大主題，第一係港交所有乜方法協助本地券商嘅商機同減低經營成本，第二當然係飯局「重頭戲」，本地券商對港交所重推收市競價時段同市調機制（又稱漲跌停板制）嘅初步睇法。
自從港交所上周五公布諮詢文件以來，除咗中小經紀反對收市競價係「指定動作」外，亦開始不斷有聲音反對市調機制，但港交所今次對推行兩制似乎係「勢在必行」，自然想搞掂班中小經紀。
普遍接受市調機制
張華峰就話，業界普遍接受市調機制，事關若股價突然Chok上Chok落，有冷靜期係好事。仲話對比內地市場漲跌停板10%係全日，香港5分鐘就開番，已經好咗好多！
至於收市競價，佢就話，業界反而未有一致意見，重申「只要能說服到我，機制係唔會畀人操縱到，我係唔會阻住個地球轉！」
張議員喺飯局前釋出咁大善意，睇嚟呢場破冰飯局會有好結局！
余絲韻