Market Insight：國美盈喜帶動轉勢

查實由瑞士央行頂唔順，被市場先生擊倒放棄干預匯價升值，到昨日意大利總理倫齊出席世界經濟論壇時打晒開口牌，話歡迎歐元貶值，期望見到同美元一兌一。既然歐央行放水，且看今浪港股可唔可以趁機試返去年九月魚缸對滬港通表錯情，盲舂舂炒出嚟的高位25,362點。

炒4G上客數字受惠於低價手機氾濫，中移（00941）昨再升1.1%收103.3元，中段見過104.7元七年半新高，小小意外係昨品題的聯通（00762）升得0.6%，輸畀中電信（00728）的2.2%升幅。不過，中資電訊股短期仲係手頭唔夠倉底，要急急追貨的基金經理杯茶，可以放心捧場。

古勝冇點你

萬里長空

二三線股鑊氣未足

另外，隨着人行短期放水預期升溫，俗語話buy on rumor，消息確認前，一味夠平的內銀股，應該可以炒多一轉。在上述一堆大市值低PE股份受追捧下，昨日二三線股表現相對失色，上升及股份下跌比例46對54，跌多升少之局，短期睇怕又返到炒大（價股）唔炒細的局面。

喺○九年充當白武士，認購國美電器（00493）可換股債券的貝恩資本，悉售手上9.22億股國美，作價1.13元。貝恩當年以18億元認購國美換股債券，行使價1.108元，去年以1.31元沽掉7.69億股，今次將剩餘貨尾平手價清貨，如果計算五年多時間的投資成本，就算以慘勝去形容都唔過分。

貝恩同國美高管唔多「啱牙」，賓架界屢有所聞（盛傳入股徽商銀行（03698）成為導火線），貝恩於一四年已經沽過一次貨，分手消息未算太意外，國美股價昨日企住批股價樓上，睇落短期掃除「基金出貨陰霾」，威力應稍稍大過「國美失去國際策略投資者，改善管理的機會」。

咁啱得咁蹺，貝恩一沽貨，國美出盈喜，昨日傍晚話一四年度業績，門市收入有4.5至5%增長，電子商貿交易則按年勁升逾八成，單是第四季度電子商貿收入按年會有一倍升幅，而去年全年利潤估計會大升四成左右。

綜合毛利率見改善

佢份通告有穩住因貝恩沽貨而動搖的其他投資者的味道，以一三年全年賺8.92億元人仔，即全年賺12.48億元人仔，介乎街外預測11.5億至14.2億元人仔之間，但綜合毛利率改善到18%，又確係唔錯。貨源似乎落入強手之中，以1.13元批股價作止蝕，短期可以留意。

海嘯之後，港股的低位支持有逐漸上移的趨勢，但就算港股近日逐級上，同七年前的三萬二點比較仲有段距離，講到底，過去幾年無其他投資好得過買磚頭，全球央行的印銀紙救市措施，未谷起全球通脹及經濟回到「正常水平」，但就先推到資產價格去瘋狂的高峰。

早兩日有個「全球最難負擔樓價」調查，香港認真巴閉，五度蟬聯冠軍，以17年家庭收入平均，先夠買到一層中位數樓價物業，樓市貴絕全球。有趣係，第二位亦港人移居熱點溫哥華，要10.6年收入，再數落去係澳洲悉尼的9.8年。

統計數字有冇誇大？以舊年第三季香港家庭收入中位數大約28萬元，17年相當於476萬元，以最近居屋都賣到四、五百萬，話香港樓價惡頂應該唔算誇張，只係調查似乎無考慮稅率以及香港近半人口住進公共房屋的因素，如果計埋一併考慮，高收入家庭幾乎將一半薪水，直接（薪酬稅）或間接（消費稅、省稅）進貢畀政府庫房的加拿大準樓民，計落惡頂程度應該同香港不遑多讓。

內地客助長高樓價

除咗磚頭，可以貴賣貴買的，其他都好難做到，試睇政府統計數字，一三年家庭收入中位數5萬元以上佔本地住戶17.8%，中產以上的高收入家庭佔港人比例其實唔多，若每月收入五、六萬蚊首期點都儲到，但係供四、五百萬樓實際都供到氣咳。

本來一個地方樓市，點都會同勞動力收入多寡、營商環境是否理想直接掛鈎，但回歸後，香港人要同內地豪客爭，樓價亦同市民負擔脫節。最近古勝的溫哥華親友置業，話因有中國移民關係，通常成交價要比放盤價高，而且要做按揭等銀行批核的，想買到樓難比登天，事關大部分大陸買家都現兜兜用現鈔交付，搞到當地買家好難上到車，計落樓市惡頂指數，其實變相是內地人最想移居地方排名似啲。

古勝