絲絲講場：克魯格曼：中國數據信唔過

又愛又驚瞓唔着

尋日喺亞洲金融論壇上佢又重申，中國經濟數據信唔過，話冇可靠統計數據好難分析點進步喎！而對於香港，佢形容：「香港樓價好瘋狂！」佢仲話，中國經濟狀況嚇親佢，唔係因為錯誤政策，而係調整嘅幅度，感慨諗起中國經濟面臨嘅挑戰，就足以令佢成晚都瞓唔着。

克魯格曼擔心中國勞動力萎縮，同一孩政策嘅後遺症有關係。另外，中國需解決經濟增長需求問題。

如果克魯格曼係中國政府嘅話，會點刺激內需？佢就話，會喺房屋政策同社會福利着手。又話如果想轉型為消費主導型經濟，就要企業豐厚嘅利潤袋多啲落工人個袋。

被問到中國嘅潛在危機，佢即答係「環境」，唔知克魯格曼係咪畀北京嘅霧霾嚇親呢？雖然佢話中國又科幻又得人驚，但其實係好關心中國市場，認為「未來仍屬於中國」。

畀香港樓價嚇親

最後，絲絲聽講克魯格曼尋日仲抽空同特首見咗一面添！而喺論壇上，克魯格曼被問到有報告指香港樓價貴絕全球，佢就話都有同朋友討論過，覺得香港樓價好瘋狂，可能因為地方面積細，令到香港樓價上升吧！

余絲韻