京東CEO劉強東近日話雪櫃（內地稱冰箱）行業嘅毛利率曾經一度高達六成，但在京東等電商出現後，雪櫃毛利率已被壓至10%唔到，但佢語不驚人誓不休，直指具備京東智能接入功能嘅雪櫃可以免費派畀街坊。
何解雪櫃可以唔使錢？原來呢個就係大數據衍生嘅無限商機所作怪，佢話京東智能雪櫃有好多傳感器，能夠感應到用戶放咗幾多飲料、蔬菜、水果及肉類，而且仲可以提醒你要refill，比如你雪櫃無晒飲料，屏幕上便會推送京東嘅購買資訊，只要用家喺雪櫃屏幕click一click，就可以安坐家中等收貨。劉強東好大口氣咁話，電商同廠家可以通過網上方式賺錢，雪櫃自然可以免費派街坊。
劉強東就係靠呢種後續收費，加埋向商家售賣反映用戶需求嘅大數據，睇嚟可以大賺一筆，京東為此已經成立一家針對智能硬件嘅公司NSNG，意思係「No Smart No Goods」。至於用家方面，想有個想像力豐富又體貼嘅雪櫃就要犧牲少少私隱喇。
余絲韻