期指觀瀾：大市重返橫行悶局
中證監查內地券商孖展，昨日A股股災一樣，又一次證明一個監管及投資者都唔成熟的市場，可以有幾瘋狂。早就A股化的港股，恒指昨低開132點，全日級級落搵即市支持，A股收市前夕，恒指跌到最低23,590點，比開市價走低381點方能止住，最後一小時跌幅稍收窄，跌365點收23,738點。
若以昨日收市計，恒指於20日及50日線尚守得住，但10日及100日線就已先後失守，國指更跌600點收11,475點，大跌市關係，主板成交增至1,278億元，全日1,300隻股票向下。
上周五即月期指未平倉數字，減至9.6萬張，過去幾日對於偏低的未平倉數字，筆者抱有戒心，估計大戶部署單邊挾升的機會唔大，經已抱住贏粒糖都要小心輸間廠出去的準備，可惜上周五把期指好倉走掉，未能狠心把國期都一併微利離場，換來昨日一開市倒輸150點出去打靶的結果。
兩個半月內，恒指五次在24,113至24,369點之間見頂回落，去年炒滬港通時做出的25,362點至22,565點調整的0.618反彈阻力24,293點，證明阻力非凡，未來要確認進入單邊升市，必需先確認突破這重要阻力。經昨日一跌，後市又要返到22,500至24,000點，悶死人無命賠的橫行市況。
John Mullen