Market Insight：高息房託再度抬頭

睇番十二月，由於股民落力借孖展，人行落力泵水，滬綜指由2,682點起步，勁升20%去到3,234點。昨日數據公布後，近日在3,300點頂到實的滬綜指，又再發力狂升3.5%，收報3,336點。依家市場共識係，在阿爺首肯及人行配合下，股市同股民彈藥不缺，悶足七年，啱啱發威的A股未係調整之時。

港股多得A股大發神威，恒指昨升穿舊年十一月高位阻力24,313點，收報24,350點，升238點，主板成交回升8%至931億港元。國務院通過機關事業養老體制改革，估計長遠利好養老金管理及投資保險生意，兩隻內險加埋友邦（01299）成為升市火車頭。國壽（02628）及平保（02318）升3.6%及3.9%，友邦都有2.2%進帳，三隻保險股貢獻恒指81點。

古勝冇點你 2015/01/16

萬里長空

資金仍傾向炒大股

內銀股抖完氣亦都再發力，工行（01398）、建行（00939）及中行（03988）的升幅介乎0.9至1.3%。不能不提，昨日下跌股份792隻，比上升股份多136隻，創新低股份36隻，差不多是創新高股份21隻的1.7倍，整體市況氣氛唔似指數表現得咁好，主要係再有小型內房股被洗倉，影響所及，個別曾經當炒中資股及二三線股都浸浸落，在炒大唔炒細，資金由唔同板塊換貨頻率極高底下，散戶入市博呢類股份反彈，記緊要訂止蝕，知進退。

唔知看官仲記唔記得比特幣（Bitcoin），過去幾年美國連環QE，癲到有人唔信銀紙，走去信虛擬貨幣Bitcoin，更曾盛極一時，惟此一時、彼一時，近排Bitcoin價級級落，隔晚大貶值兩成一。唔知同Bitstamp平台早前傳出被黑客攻擊有無關係，但毫無疑問，去年中開始全球對美元資產信心返晒嚟。美元匯價由舊年五月大升一成七之後，睇番Bitcoin由一三年底「中國大媽」瘋搶時造出1,165美元兌一Bitcoin高位，撻到落166美元，重挫八成五，證明無論金市好、Bitcoin好，大媽掂親都係最佳反指標。

通縮威脅大於通脹

講番正題，近期國際商品價格大插水，油價由107美元一桶，半年多些少，殺到落44美元水平，金銀銅鐵無一不跌，覆蓋能源、金屬、農產品、牲畜產品的美國CRB指數，同期亦由313點跌到落執筆時低位218點，跌幅達三成，只有美元資產一枝獨秀，隔晚美國國債孳息落到最低1.78厘（代表債券價格向上），落到近二十個月低位，反映出大孖沙認定全球對大宗商品需求會持續疲弱之外，未來通縮的危機要比通脹復甦更大。

若仲係唔信，睇埋其他經濟成熟市場，十年債息低過美國的，歐洲有英、法、德、意、瑞典、瑞士及荷蘭，北美洲有加拿大，亞洲有日本同台灣，全球超低息經已恒常化，超人話事偈，就算美國今年真係會加息，由債息所見，加幅亦會相當有限。

近期高息股再度抬頭，撇除內銀及內房，股息回報未來有可能跟隨盈利水平回落，「兩電」（00002及00006）其實係唔錯之選擇，昨電能更創52周高位，但一八年同政府再傾利潤管制協議，最後會點仲係有變數。

REITs應該係比較理想之選，兩隻資產集中內地的，匯賢（87001）及越秀房託（00405）明顯跟唔上本地物業REITs，早於一三年見頂，即使兩個基金過去年多都曾經收購新資產擴大投資組合，但就無法令估計內地商用物業租值短期見頂的投資者有所釋懷。

置富值博率高一線

數落去，最正路始終係晒士較大的領匯（00823）及置富產託（00778）。睇番十年期美債息在一三年五月落到1.6厘水平，當時領匯及置富預計派息率落到去3.8及4.5厘，當時息差約為2.2厘及2.9厘。依家兩隻REITs一五年預計派息3.5厘及5.4厘，相當於息差2厘及3.6厘。領匯入咗藍籌有指數基金捧場，息差比過往收窄可以理解，但計落，看來以置富值博率相對較高。

古勝