成日話北望神州，喺中國愈嚟愈強嘅情況下，中外資機構都把握每個商機，隨時撞啱一單大刁，就一躍而起。好似美銀美林咁，憑住中國南車（01766）同中國北車（06199）嘅合併交易，就喺二○一四年亞洲交易撮合排行榜，由第三名「嘭」一聲升上第一位！
上星期，中國南車宣布同中國北車合併，並成立中國中車，呢單交易價值「大嗱嗱」260億美元，除咗令兩隻股份股價飆升外，仲即時帶挈美銀美林添。因為美銀美林同中金喺單刁度提供諮詢服務，兩者隨即瓜分咗「大大份」撮合金額。就係咁，美銀美林就一舉超越咗原本第一、二位嘅花旗同高盛，登上二○一四年亞洲交易撮合排行榜首位。
原來舊年亞洲頭三宗最大型嘅交易，都係拜國企改革所賜，亞洲地區交易撮合金額仲創紀錄新高，達到6,510億美元，即係約5.07萬億港紙，按年多咗五分之一。
雖然有參與南、北車單刁嘅Banker向絲絲呻，話做呢單刁好複雜麻煩，比起其他國企合併仲難搞，原因就係兩公司都喺中港上市，涉及四班股東，當中嘅手續、監管機構等有唔少問題要處理。不過，隨住國企改革推進，呢類交易陸續有嚟，咁大生意唔通唔做咩？！
余絲韻