大家仲記唔記得自己19歲嗰陣做緊乜？雅虎移動嘅未來，可能就要靠一個19歲嘅大學生！當然，呢個學生並唔普通，而係之前創建咗新聞搜尋應用程式Summly嘅神童Nick D'Aloisio。
Nick係叻仔一名，15歲嗰時研發新聞應用程式Summly，17歲嗰陣以3,000萬美元將Summly賣畀雅虎，之後Summly變咗雅虎旗下一個新聞摘要應用，為用戶提供人性化、簡單易讀嘅新聞資訊。
依家Nick仲喺牛津大學讀緊電腦科學同哲學，放假期間就會兼職雅虎產品經理。近期仲要飛去硅谷同雅虎高層、研發團隊開會，因為蘋果公司（Apple Inc.）嚟緊會推出Apple Watch，佢哋忙緊研發適合Apple Watch使用嘅新聞資訊版本。
雖然頻撲，但Nick依然樂在其中。不過，佢都要盡快完成Apple Watch App，趕住應付學校考試。而Nick談及自己嘅理想時話，希望建立自己嘅大公司，引入人工智能同神經網絡。
另外，關於雅虎嘅新消息，仲有突然傳出雅虎行政總裁邁耶又想進行收購，據講佢有興趣購買有線網絡，例如CNN（有線電視新聞網絡）咁話。
余絲韻