嚟到一五年，大家一定仲沉醉喺新年嘅喜悅當中。不過有人歡喜有人愁，喺上個月三十一號大除夕晚，被喻為現實版「Iron Man」、特斯拉（Tesla）創辦人馬斯克（Elon Musk）同佢嘅妻子Talulah Riley再次離婚。點解話係「再次」？因為佢哋喺一二年已離過一次婚！
3年前，馬斯克喺佢哋第一次離婚嗰陣，喺Twitter寫咗一番說話去祝福Riley，佢話：「這是美妙的4年。我會永遠愛妳。終有一天，你會令另一個人感到快樂。」但係，喺年半之後，佢哋又再次撻着，不過喺呢個星期三大除夕，呢對夫婦再一次離婚，今次Riley袋咗1,600萬美元分手費！
今次馬斯克冇再喺Twitter公布消息，但喺回應第三者傳聞時，馬斯克仍然對Riley讚不絕口，話每個認識Riley嘅人都會認同，佢係世界上其中一個最善良同溫柔嘅人，有第三者嘅傳聞係假嘅。
原來今次已經係馬斯克第三次離婚。佢第一任妻子係小說家Justine Musk。呢段婚姻維持咗8年，仲長過佢同Riley嘅兩次婚姻。
馬斯克後生嗰陣已經由碩士課程中退學，開發出版軟件，之後又製造出第一架喺商業上大受歡迎嘅電動車品牌特斯拉，佢仲係第一位私人發射火箭公司Space X同埋太陽能城市SolarCity嘅老闆添。作為多領域嘅初創先鋒，睇嚟除咗創業之外，喺神聖嘅婚姻方面都好「創新」。
余絲韻