絲絲講場：科勁太子女整Henna祈運
科勁主席黃少華囡囡黃宓芝（Gigi）兩人都係公司執行董事，佢尋日露面嗰陣，畀絲絲發現佢對手整咗近年好興嘅印度手繪Henna。佢話前排去印度參加印度同學嘅婚禮，個同學知佢公司搞上市，就幫佢畫Henna祝福佢。
自費進修 讀EMBA
Gigi好驚人哋以為佢走咗去紋身，尷尷尬尬咁收番埋對手。咁絲絲梗係知Henna唔係紋身啦，係當皮膚係畫紙嘅印度傳統藝術，象徵好運o架。Gigi仲話今次個Trip會順便睇吓印度有冇拓展機會，話公司都想打入新興市場喎。
唔講唔知，原來Gigi仲讀緊書，喺香港讀遙距EMBA課程。Gigi入咗公司八年，直至前年先升做執董，年僅31歲嘅佢仲拉低晒管理層平均年齡。年輕係佢最大本錢，佢話自己年資短，要喺學業上努力吓，趁工餘進修，預計一六年畢業，到時繼續幫公司。
佢仲好認真同絲絲講，EMBA課程係自資唔係公司贊助o架。
余絲韻