絲絲講場：張耀堂出山 重掌八達通
絲絲近日收到一個震撼消息，Farewell冇耐、今年三月先榮休嘅八達通前CEO張耀堂（Sunny）出山重掌八達通，放埋幾日假之後，今個星期五就正式返工。
上任CEO半年閃辭
支付界人才一向渴市，高層來來去去都係Visa、萬事達、銀通同八達通換位，遇着有人退休或者轉行你都咪話唔頭痕。上年喺八達通做CEO嘅Sunny宣布退休，Last Day一推再推，直到八達通幾經辛苦由萬事達請咗高敏德（Kevin）返嚟，佢先正式榮休，點知Kevin做咗唔夠7個月就閃辭，搞到呢兩個月八達通又要周圍敲門挖角。
絲絲有理由相信，八達通打盡人情牌兼銀彈先請到Sunny出山。Sunny退休生活多姿多采，除咗同朋友家人坐吓郵輪出國，閒時又會打吓Golf，不知幾引人羨慕。相信佢今次重返將會帶領八達通再闖高峰。
支付界求才若渴
好似Sunny喺金融界打滾幾十年、又有豐富支付公司經驗嘅人才，係行內搵十隻手指都數得晒，好似銀通老臣子曾憲求咁，據聞舊年已提出話想退休，但銀通今個月先成功搵到環聯信貸資料庫蔡炳中過檔接棒，所以話支付界請人唔易呀！
余絲韻