絲絲收到路邊社消息話，阿里巴巴諗住推出一部阿里自主品牌嘅電玩，希望食正年輕人市場。若然阿里能夠喺中國一舉成功，仲會順手推向國際市場，實行向兩大傳統對手微軟Xbox One同日本索尼PS4挑機，唔怪得阿里股價係咁升喇！
之不過，要砌低當今電玩市場兩大巨頭唔係講咁易，除咗遊戲機硬件外，又要搵唔少合作影伴幫手開發遊戲，就好似索尼計劃同70家廠商合作，微軟亦建立類似嘅商業聯盟，過程認真唔簡單，但阿里亦唔係冇機會o架，話晒阿里旗下有幾億用戶，人多勢眾嘛！
睇嚟呢個消息都幾真，阿里最近向社交遊戲平台KTplay投資咗1.2億美元，而最近又將Angry Birds呢個經典遊戲引入中國市場。
講開又講，「第二屆中國淘寶村高峰論壇」尋日開幕，阿里集團旗下嘅阿里研究院公布咗內地分布各省市嘅「淘寶村」數目增至211個，同時湧現咗19個淘寶鎮。所謂「淘寶村」就係指大量網商齊集某個村落，以淘寶網為主要交易平台而形成嘅網商族群。而呢211個村裏頭，就包含咗超過7萬個活躍買家。
余絲韻