一年之計在於春，專喺內地大城市打造超豪商住物業嘅SOHO中國（00410），主席潘石屹透露，繼兩年半前轉型做收租佬有成後，計劃第二步轉型，諗住用互聯網改造項目。潘總話時代唔同咗，現時旗下寫字樓九成客戶都係互聯網企業。
潘總緬懷過去兩年半SOHO中國嘅轉型，話說一二年嗰陣，公司便宣布三年內逐步告別銷售嘅商業模式，改為持有出租物業。對於這家一向以銷售著稱嘅地產公司，轉為挑戰更大的收租持有模式，潘總坦言絕對係一個重大挑戰，而市場當時並不看好。
今年可以話係該企收租物業收成期，好似位於北京CBD區的光華路SOHO二期項目咁，近期便建成並交付使用。僅今年，就有北京望京SOHO、光華路SOHO、上海復興路項目、上海凌空SOHO相繼建成交付。
潘總仲話，目前SOHO中國策略係盡量少攞地，主要仲係將現金轉換成項目，控制淨負債率水平。SOHO中國目前淨負債率水平為15%左右，未來帳上現金規模將超過200億元人仔。
喺主力做高檔收租物業之餘，SOHO中國嘅第二步轉型大計亦將展開，而互聯網思維方面嘅變革將成為該企未來嘅方向。潘總就透露，預計喺明年二月一日，SOHO中國將正式推出與互聯網合作嘅平台，屆時會有二、三十個項目參與其中，具體細節到時將會公布。
余絲韻