屯門住宅物業樓價「起飛」，連帶商場都要「升呢」，除咗屯門核心嘅屯門市廣場、華都同新都商場大革新外，市中心周邊嘅友愛邨、安定邨都全方位提升，領匯（00823）更不惜豪花4.77億重修屯門旗艦商場，將友愛及安定商場合二為一。領匯CFO張利民尋日就親臨新商場，宣布正式開幕。
張掌櫃計過，話今次係上市以來最大投資額嘅翻新項目，仲講明睇好屯門區消費潛力，希望投資回報率約15%，可以好似其他翻新項目咁兩、三年後體現出來。
項目及資產發展總監梁玄狄（Dick）解釋，今次提升係領匯戰略部署重要嘅一步，集團旗下商場早年已發展，希望透過提升打造交通樞紐的中端商場。唔怪得知，友愛新街市有客戶服務中心之餘，連手推購物車都供應埋啦。
領匯物業管理助理總經理歐珮珊（Sandra）話，呢個旗艦商場改名為「H.A.N.D.S.」，代表嘅意思就係Have A Nice Day Shopping，目標客戶主打年輕一族，雖然五大區域嘅物業內部樓面面積維持約19.71萬平方呎，但將原有中式食肆面積下降20%，所以零售商戶數目由104個增至148個，食肆商戶增至22個。依家仲有一個區域未完成，但係出租率已相當滿意咁話。
余絲韻