期指觀瀾：國指破位恒指跑輸

話港股愈來愈A股化一點不過分，單睇過去幾日，陰陽燭圖上梅花間竹走勢，唔少炒家頭都大。恒指周三後抽，即市高見23,921點，完全回補星期一恒指的下跌裂口後低收，若以為完成後抽，睇勢追沽，又被個市殺到一頸血，昨日恒指升403點報23,832點。

本周四日以來都離不開23,293至23,921點，筆者堅持恒指上破24,313點或跌穿23,252點頸線，先判定後市點行都唔遲。反而，因為A股狂升關係，大國企追升下，國指走勢相對明朗，國指昨突破九月初高位，收11,481點，反之恒指距離25,362點足足有1,530點之多。

主板成交連續四日高企千億元樓上，但沽空比例持續高企，昨日雖回落至13.96%，依然高於近半年9至11%平均區間，反映基金並唔認同內地散戶睇法，最後誰勝誰負，應快有答案。今晚美國公布就業數據，加埋炒周末人行降準，無謂博，指數破上述橫行區前，筆者決定繼續做花生友。

John Mullen