Market Insight：高息中資股有得諗

毫無疑問，近排內地股民殺紅了眼，只着眼人民銀行接受現實，開始採取較寬鬆的貨幣政策，以扶起增速放緩的中國經濟；再者，A股由○七年的6,124點高位，也實在經歷了太漫長的調整，民間積壓多年的購買力，一瞬間釋放出來。

以一個八成交易來自散戶的股票市場，到底可以有幾咁唔理性？依家真係好難估計，如果純睇技術走勢，滬綜指由○七年十月的6,124點，跌到落最低1,664點反彈，○九年中央的四萬億人仔救市年，滬綜指曾經反彈見3,478點，預計會係中短期最大阻力，一旦升穿，可以確認A股自○七年一浪低於一浪的形勢有所改變。

古勝冇點你 2014/12/05

萬里長空

A股散戶瘋狂喪炒

如果由開戶人數睇，中國結算啱啱公布截至十一月二十八日的一星期，新增A股開戶數目37萬，是連續七星期高於20萬水平，股市生力軍是源源不絕。不過，同○七年癲峰期的單周166萬個新增散戶相比，又仲有一段距離。

股市永遠是贏的人少、輸的人多的英雄地，經驗告訴我們，當銀行大利市機前逼滿散戶，茶餐廳侍應掛住篤水機（依家當然用手機），散戶爭先恐後怕執輸的蜂擁入市，股市成交額愈高，也就距離短期浪頂愈近。前日，即係本周三，滬深兩市的總成交金額達到創紀錄的9,148億元人仔，不但創咗中國股市紀錄，也創咗世界紀錄。

美國○七年次按風暴爆發前，華爾街最高單日成交1,400億美元，如果以今日匯率計算，前日滬深股市成交額達到1,486億美元，刷新美股當年最癲紀錄。有趣是，今日中國股票市場總市值4.6萬億美元，只及當年美股總市值19萬億美元四分之一咁上下，近期A股炒風有幾瘋狂，大致可見一二。

綜合而論，在下相信A股短期以尖頂回落，進入調整的機會極大，不過到底係三千二定三千四？以一個狂熱散戶充斥的市場，真係好難估，○九年以來，中央多次出口術托市，今次加埋有貨幣政策配合，可以肯定今次係最成功的一次。

港股沽空比率高企

講番港股，恒指升403點收23,832點，但睇番周一至今，恒指隔住嚟低開高收，高開低收，恒指比上周五收市23,987點，仲跌緊155點，主板成交1,174億元是第四日企住千億水平樓上。滬港通的南下配額，通車至今累積用咗46億人仔，幫到港股幾多，股民係心知肚明，反而兩隻A股ETF，安碩A50（02823）及南方A50（02822）加埋日日過百億成交（相當多的沽空），港股交易額有番啲生氣。

近幾日港股喺高成交額下，沽空金額亦都唔嘢小，昨日雖由周三200億元落返去164億元，沽空成交比仲係高企13.96%，唔少唔信A股可以好似《星際啟示錄》咁，反地心吸力的基金經理，不斷增加幾隻A股ETF的淡倉沽空，整體大市亦都有陰陽怪氣，資金集中湧入指數重磅國企，反之，唔少基金增長股及二三線股被沽到開巷。昨日創新低的股票有66隻之多，大升市中，整體大市升跌股份比例係1對1.1，完全唔似一個四百幾點升市應該有的氣氛。

牛熊證炒家同期指客，今日係跟又死唔跟又死。外圍方面，今晚美國出十一月就業數據，歐洲第三季GDP出籠，就算話佢影響唔大，但中資股炒到半天高，個個賭緊周末人行會宣布第一次降準，降都好哋哋，萬一唔降，會唔會出現反高潮，真係自己諗過受唔受得住先好坐衍生工具過周末。

市場不乏其他選擇

工行（01398）發行三幣優先股，認購反應真係隨時仲勁過隻中廣核電力（01816）！朋友話美金結算嗰隻，經私人銀行戶口入飛的專業投資者，分配比例唔夠溫巴仙，反應比較冷淡的人仔計價優先股，分配比例都係一成一左右，即係超購接近九倍，以咁大發行晒士，真係誇得緊要。

當然，最後如以上限定價，相當6厘息，昨日賣家一開波叫價5.5厘，再追落去二手市場，相信已經無乜水位，向隅客不如諗諗一啲高息中資股，好似電力股，或者索性買番些少中小型內銀股好過。

古勝