大家時不時都會喺電視度見到機械人，但就冇乜點聽到佢哋實際應用喺生活當中。絲絲收到消息，機械人已經滲透咗喺商戶應用之中。美國感恩節後一日，又即係「黑色星期五」，向來都係美國民眾開始為即將來臨嘅聖誕節掃貨嘅好日子，而近年中國消費者亦會趁美國各大商戶推出折扣優惠而大手入貨。
剛剛進軍內地網購市場，並開設物流中心嘅美國最大電商亞馬遜，為咗應對數量龐大嘅訂單，就使用咗Kiva機械人幫忙「執頭執尾」。對於亞馬遜呢股機械人新勢力，作為內地最大電商之一嘅阿里巴巴，聽講都開始感受到威脅添！
喺一二年，亞馬遜用咗7.75億美元，收購咗一間叫做Kiva Systems嘅自動化物流提供商。啱啱提到嘅機械人，就係呢間公司嘅產物。到一三年，亞馬遜正式喺3個倉庫入面，投入咗1,400個Kiva機械人。依家亞馬遜旗下嘅10個履約中心已經添置咗15,000個Kiva機械人。千祈唔好睇少佢哋，有報告指，呢啲機械人每年可以幫亞馬遜慳約4.6億至9億美元（約35.9億至70.2億港元）嘅成本。
咁佢哋咪同人類爭工做？唔使驚，亞馬遜話，今年公司仍然會請8萬個季節工，仲多過舊年差唔多一成半，其中一部分人更加有可能可以做全職添！
余絲韻