虛擬貨幣Bitcoin（比特幣）一度炒到成行成市，深受投資者愛戴，但畀監管機構𥄫到實一實嘅銀行界似乎就唔係咁睇。唔知係咪見到用比特幣進行不法活動嘅網站Silk Road舊年畀美國FBI冚檔，據外國傳媒爆料，近年官司纏身嘅滙控（00005），拿拿聲Cut咗Bitcoin投資基金Global Advisors（GA）個銀行戶口。
不過唔同嘅係，Silk Road真係用咗比特幣進行不法交易，但GA係全世界首個獲監管機構批准嘅Bitcoin投資基金，剛剛今年八月先喺澤西島成立，當地政府都好支持佢哋，所以GA日前收到滙控嘅通知，話60日後會Cut咗佢哋嘅銀行戶口時，都感到有啲無奈。
GA企硬話自身監管好嚴格，今次滙控無端端Cut佢哋戶口，估計係怕再次捲入洗黑錢危機。但滙控並無回應外媒，GA究竟係唔係該行客戶，又或者以前曾經喺該行開設戶口，只係輕輕咁回應咗一句：「唔會輕易取消客戶戶口。」
不過，大家都知啦，近年多間大行十幾億十幾億咁畀監管機構罰，唔少都係因為監管洗黑錢不力，難怪滙控要小心嘅！
余絲韻