孖妹S檔案：金融財俊語眾不同

識講韓文助打交道

李：瑞士域寶資產管理（亞洲）董事總經理 李文傑（Peter）

Kitty： 姊妹們中「星星毒」而去學韓文我聽得多，你啲韓文咁流利，唔通係為咗結識Agassi（韓文：小姐）？定係因為愛上咗食炸雞？

破除亞企與外資隔閡

李：我以前喺私募基金工作，經常要到外地物色投資機會、進行盡職審查等，已經先後到過倫敦、德國、泰國及南韓，留喺南韓嘅時間較長，有四年。

由於經常要同當地企業高層及創辦人「打交道」，所以自己決定邊做邊學韓文，就算只係識幾句都好，人哋都會覺得親切啲，覺得你尊重佢哋嘅文化，會更願意同你溝通。尤其喺九七亞洲金融風暴後，亞洲企業對外資好抗拒，認為佢哋係去「執平貨」。

彩兒：識講當地語言對你嘅投資有咩幫助？

李：其實好多投資機會都係我同當地人溝通時接觸到o架，到睇研究報告時先發現就太遲喇！例如每次同南韓人應酬，佢哋都好鍾意飲燒酒，鍾意到直頭當水飲，其中龍頭品牌就係Jinro（真露）。又有次從客人口中得知，由於生活習慣嘅改變，泡菜雪櫃幾乎成為每戶必備嘅家電，其中最受歡迎嘅品牌叫Dimchae。

泰國出口勁競爭力大

Kitty： Peter，原來你留喺泰國嘅時間都有三年半咁多，應該學識咗唔少泰文啦！

李：都識o架，嗰時聽得最多嘅一句就係「邁並賴」（泰文粵語拼音，意即「無問題」）。泰國人事事以和為貴，成日將「無問題」掛喺嘴邊，但到最後通常都好多問題。相反，南韓人就係「講得出做得到」嘅類型。

彩兒：南韓綜合指數過去六年已由1,200點左右升至約2,000點，當地市場對投資者嚟講仲有無吸引力？

李：其實近年好多投資都撤出咗南韓市場，因為目前整體PE已經算高，加上唔少大企業好似三星集團、現代集團等，業績都出現倒退。相反，泰國就係今年表現較好嘅亞洲市場之一，加上農產品出口強勁，勞工市場競爭力又不斷提升，所以投資者對市場依然好有興趣。

李文傑小檔案

現職：瑞士域寶資產管理（亞洲）董事總經理

學歷：澳洲悉尼大學經濟及財務學士學位

履歷：德勤會計師事務所核數工作及企業服務顧問、柏林銀行亞洲財務項目聯席主管、荷蘭銀行收購合併部總監等；曾任澳洲會計師公會大中華分會會長

語言*：韓文、泰文、意大利文（少許）

*除「兩文三語」外

鑽研法文化建互信

鍾：東方匯理資產管理香港北亞區行政總裁 鍾小鋒

彩兒： 孖妹嘅法文係「有限公司」，打聲招呼、講句Bonjour（法文：你好）都仲應付到，但你由讀書到工作呢30幾年都成功將法文活學活用，真係要大讚一聲Bravo（法文：了不起）！

　鍾： 當年中國處於改革開放初期，法國嘅文化氣息同獨立精神特別令年輕人嚮往，所以大學時期我決定到當地留學，修讀法文及法國文化相關課程。我喺法國住過9年，又喺法國企業工作咗18年，從感情、生活文化及朋友圈各方面嚟睇，我已經將法文視為我嘅『第二母語』，曾經仲有人話我講嘅英文帶有法國口音添！

Kitty： 識講法文嘅中國人，面對國際市場應該好吃香。你又點樣運用呢種優勢？

鍾：以前喺投資銀行部工作，由於自己對法國文化及企業有了解，所以同投資者溝通時好容易建立互信關係，自己亦更易明白佢哋嘅想法及需要。如果想做全球性嘅投資，了解多個國家嘅語言亦係好事，因為可以直接得到第一手資料，避免因翻譯產生資訊錯誤或不足嘅情況。

我依家嘅工作主要係管理團隊、制訂及落實發展策略等，較多與公司總部同事溝通，亦發現由於自己有語言優勢，所以溝通時會更有效率，可減少誤會發生。

歐洲經濟明年將改善

彩兒：投資者對目前歐洲經濟情況甚為關注，你對當地及環球市場有咩睇法？

鍾：中國早前宣布降息，日本及歐洲央行又維持寬鬆貨幣政策，所以預期全球高流動性、低利率嘅投資環境會再延續一段時間，同時地緣政治、伊波拉疾情等風險因素正在淡化。雖然市場對歐洲經濟未恢復信心，但部分歐洲國家已進行結構性改革，目前市場流動性充裕，加上美國經濟復甦及歐元弱勢可以幫助拉動出口，我相信歐洲經濟明年開始會逐步改善。

另一方面，我繼續睇好亞太區嘅增長前景。內地A股早前突破2,600點係重要訊號。再者，滬港通已成功通車，隨着人民幣持續國際化，中國資本帳項目亦持續開放，相信中國嘅股市及債市將會同步利好，而以中國為首嘅亞太區新興市場，於全球市場嘅地位亦值得評估。

其實投資界以外，對任何人而言，掌握多種語言都係好事，既可擴闊眼界，又可學習文化包容、培養更廣闊胸懷。

鍾小鋒小檔案

現職：東方匯理資產管理香港北亞區行政總裁

學歷：法國巴黎政治學院政治學博士學位、政治和國際關係學碩士學位

履歷：東方匯理企業及投資銀行業務北京分公司董事總經理、東方匯理資產管理香港副行政總裁

語言*：法語

*除「兩文三語」外

高妹、彩兒

若有料報畀高妹同彩兒或有嘢問，可電郵money.biz@opg.com.hk