Market Insight：六福不妨分段買貨

在本周油組國會議減產機會渺茫，油價愈跌愈有，通脹已經再唔係問題之下，同一時間，日本、歐洲央行都在擴大量寬規模，中國亦都加入寬鬆貨幣政策行列，錢唔值錢，通街游資的年代，顯然唔會因為聯儲局停止買債而停止，睇華爾街三大指數愈升愈有，就見到投資者，幾咁開心見到超低息期，有咁耐拖咁耐的狀況。

可惜係港股改不了行三步退後兩步的悶況，十一月期指結算日，個市朝早抽過一浸好快打回頭，之後全日都無貨賣，恒指跌107點報24,004點，完全無視A股氣勢如虹，再創今浪新高2,630點收市。

古勝冇點你2014/11/28

萬里長空

外資買A股仍審慎

滬港通開車兩星期，新鮮感減退，每日配額使用情況開始跌定，昨日滬股通用咗30億元人仔，港股通就用咗1.7億元人仔，以為阿爺減息可以刺激更多資金經北上管道入市，由配額用剩咁多，可以見到境外大孖沙對投資A股仲係好審慎，同近日炒得瘋狂的A股散戶，形成強烈反差。

昨日最標青表現的，要數一眾油田服務類股份，第四屆中國頁岩氣發展大會舉行，預期會上會就國土資源部頁岩氣區塊第三輪招標等作出交流，安東油服（03337）昨升16%、宏華（00196）升11.4%、華油能源（01251）升7.8%、百勤油服（02178）則上升4.6%。

昨日一早，古勝打去問隻中廣核電力（01816）孖展情況，仲畀經紀老友笑「遲唔遲啲」。話說昨日第一日IPO，一開波唔少有做孖展的證券行的孖展額度已經提光，唔係事先單聲的客仔，唔少都食閉門羹。睇情況，中廣核電成為今年新股集資王應無懸念。

中廣核電反應熱爆

顧名思義，中廣核電在內地從事核電營運及管理，截至六月底有11台營運中的核機組，包括香港人成日聽到的大亞灣核電廠，佔中國全國核電機組的五成五，所以佢亦將會係中國上市最大核電公司，旗下機組容量1.16萬兆瓦，集資主要用途包括收購台山核電41%權益，以及在建核電廠資本開支。

基於阿爺重啟核電投資，市面上無第二隻選擇，加埋「十八羅漢」（基礎投資者）早早入飛護航，認頭咗超過13億美元貨源，中廣核電聲勢可謂一時無兩。

以中廣核電招股價介乎2.43至2.78元，發行88.25億股H股，集資214.44億至245.33億元，畀散戶公開認購部分僅得5%，即4.41億股，除非超額到50至100倍或者100倍至上，會回撥至發行上限10%及20%，換句話，如果IPO入飛額去到1,225億元，就有機會啟動回撥兩成。

即使點計最後入大飛睇分配比例，都好難去到3至4%，即使開出有15至25%升幅，左計右計，最後都係打消大飛抽獎念頭，諗吓其他已經上市的新能源股好過。不過，如果看官諗住抽返兩三手，搵餐茶飲則無傷大雅。

六福集團（00590）公布截至九月底止中期業績，賺8.04億元，按年倒退16.6%，股價卻見近七個月新高，收市急彈10.3%或2.4元，收報25.6元。觀乎六福業績其實唔錯，盈利按年倒退，純綷因為去年同期「中國大媽」搶金，使半年的盈利基數大升。期內毛利率23.9%，相對去年因為低毛利金飾銷售比較高的20.1%有所改善，亦與去年下半年的24%相去不遠。因為金至尊的虧損大幅減少，純利率10.7%，比去年上下半年度的9.6%及9.8%都要理想。

全年業績超標可期

現在半年成績表，經已交出咗分析員預期全年大數一半，展望下半年財政年度，跨越中西多個消費節日的銷售旺季，按現時趨勢，全年業績超額完成機會十分大。就算跟舊預測全年賺16.2億元，市盈率亦不過9.2倍，比周大福（01929）低差不多三分之一。息率4.4厘，六福現價唔貴兼幾吸引，只嫌昨日升得急，分段買諗得過。

古勝