絲絲講場：星展潘燕明奉旨追星
八卦嘅絲絲一直以為自己緊貼娛樂圈動向，但近日終於遇到新對手，就係嚟自新加坡嘅女Banker、星展香港區零售銀行業務及財富管理總監潘燕明（Pearlyn）。
唔好以為Banker一日24小時只係識得留意個市，好似Pearlyn咁，雖然嚟自彼岸嘅新加坡，但因為成日都要為星展物色代言人，所以都好熟娛樂圈「行情」！
同男神天后合作
Pearlyn同絲絲一樣喜歡靚仔，最記得嘅當然係合作過嘅「男神」古天樂同吳彥祖，但對兩位大小「天后」容祖兒Joey同G.E.M.一樣讚不絕口。
講到星展早前搞Annual Dinner請咗容祖兒做嘉賓，Pearlyn就急不及待拎手機出嚟Show畀絲絲睇佢哋嘅合照，大讚Joey一啲都無擺天后款，仲落台同一大班星展同事們影相。
至於阿G.E.M.，Pearlyn就話小巨肺好有才華，好彩喺佢仲未上《我是歌手》前已經搵咗佢做星展代言人，真係好抵咁話！
余絲韻