綠城（03900）創辦人宋衞平「回歸」綠城，唔賣畀融創（01918）嘅消息近期炒得熱哄哄，尋日網上流傳宋衞平發出嘅聲明，指「經過100多天，我發現把綠城賣給了一個不應該賣的人！」
尋晚有消息話，融創孫宏斌早前委派入綠城嘅得力助手田強，已經被免去總經理一職，由宋衞平舊部應國永頂上。咁多消息都劍指宋總決定接返「親生仔」，公司係咪應該盡快出嚟解畫，向股東同員工派定心丸！
網上流傳嘅宋衞平「千言書」題為《我的檢討與反省》，宋衞平話過去幾個月發生咗太多負面消息，令客戶擔憂不滿、合作夥伴受到不合理對待，好多基本承諾以及同地方政府簽訂嘅協議無法有效實施等，因此「失信」成為最終唯一選擇。佢仲話會吸取教訓，「希望以後不會重犯調控綜合症、更加認真嚴謹約束自己。」
雖然宋衞平重申孫宏斌同佢嘅融創團隊，喺經營、行銷方面都非常優秀，但融創將企業盈利放喺首位，忽略企業應有嘅社會責任，所以唔適合綠城，仲寄語佢哋今後要多啲關注企業社會價值。