夢工場動畫製作嘅電影，好多都係小朋友嘅寶，重複再重複睇都唔厭，傳聞呢個「寶」會畀玩具生產商孩之寶（Hasbro）收購。
聞說收購談判尚算初步，有機會於未來兩至四周傾掂數，成為孩之寶踩入娛樂界重大一步。夢工場現時市值約19億美元，叫價約等於周三收市價有34%溢價，即係每股30美元以上，除孩之寶外，其他潛在買家亦吼住呢件「寶」。
夢工場近年積極令業務多元化，包括開拓網上影片、電視以至主題公園業務，但喺拓展消費產品市場方面，始終落後對手華特迪士尼。孩之寶向來對影視業務頗感興趣，持有Discovery家庭頻道40%股權，佢哋嘅產品亦會躍上大螢幕，好似今年橫掃全球票房嘅《變形金剛：殲滅世紀》，公司最近又推出自家電影製作公司Allspark Pictures。
若果成事，傳聞夢工場行政總裁謝菲基辛堡將擔任合併後新公司主席。至於九月底曾傳出謝菲基辛堡同日本電訊巨頭軟銀磋商合併嘅傳聞，睇怕唔會再有下文。
余絲韻