Market Insight：人仔產品吸引力增

APEC元首碰杯，茅台名落孫山，最後睇中中國食品（00506）下面長城酒業的「長城干紅2006」同「干白2011」，由於之前國宴都用過，都算熱門跑出。先旨聲明，呢個唔係投資推介，觀乎自從內地反貪，法國波爾多紅酒價已跌到一仆一碌。早幾日在下收到促銷電郵，見內地飲家至愛的拉菲二軍酒（Carruades de Lafite），由兩年多三千幾蚊，插到落依家千三蚊。

上星期一年一度香港酒展所見，內地買家的確比前疏落，幾隻內地紅酒股，本身業績麻麻，短期又睇唔到翻身之術，真係唔多敢掂。講番個賭局，在下諗住APEC會揀西方推崇，Robert Parker評分較高，個名政治又夠晒正確的「Chairman」，結果跑出「Great wall」，做咗輸家！

古勝冇點你2014/11/14

萬里長空

兌換撤限造就商機

閒話講完，上周個市連插五日，滬港通一話通車，恒指連續四日反彈，昨升81點報24,019點，主板成交839億元，比前日回升。不過，有炒開即市缸邊客應該感受到，個市升得嚟有氣無力，而且都幾側埋一邊，昨日升市主要由內銀、內險及濠賭等重磅股份撐住，成個市下跌股份738隻，多過704隻上升股份，唔少二三線股有回回哋迹象。

昨日提過對滬港通初期的取態，在宣傳工作不足，股民其實連香港千幾隻股票都識唔晒，仲邊有閒情去熟讀埋滬股通五百幾隻股票，所以大大聲細細注無妨，賭大錢暫時唔會諗。

金管局下星期開始撤銷每日2萬人仔兌換上限，在一隻零息貨幣與一隻相對高息貨幣之兌換屏障除去後，近日唔少銀行密鑼緊鼓打人仔高息理財產品主意。相關產品閒閒哋去到6至7厘，對比簿仔息長零，對於普羅大眾，都咪話無吸引力。然而，看官切記買之前，要問清楚發行商及相關資產抵押品風險。

人仔兌換大門一出，會唔會出現香港存款外流，拉高拆息，步內地銀行後塵影響本地銀行息差，甚至炒家借貸成本向上影響投資市場，希望純粹杞人憂天，不過下星期初開始，要睇實個拆息做人。

祖國科網股選擇少

染藍及半年業績好過預期些少的領匯（00823），愈戰愈勇，昨日里昂報告睇到53.2元，股價昨再升2.7%報48.2元。

至於向主席收購北美業務，被基金懲戒的新奧能源（02688），主席兩度入市增持後，股價有回穩迹象，升1.2%收報48元，睇交易前股價54.3元，假設當2億美元交易所花的跌落鹹水海，大約等於每股1.44元，在氣氛有緩和迹象下，睇嚟彈番上51至52元，並非無可能。

騰訊（00700）周三出季績，第三季度純利56.57億元人仔，較第二季輕微倒退3%，經調整純利（Non GAAP Profit）及收入分別為64.3億元及198億元人仔，都稍稍低過預期，微信及「QQ手機版」智能遊戲一如市場預期放緩，手機遊戲第三季收入亦按季放緩一成三。

騰訊股價隔晚在美國ADR跌3.1%，昨股價開125元，最終即市抽升4.5元，返到129.5元，倒升0.2%收市。好多人或者會問，以近半年最多5,295萬股成交，67.7億元街貨易手，睇見份業績麻麻依然掃到甩轆的基金到底諗緊乜？查實以一五年預期市盈率貼近30倍的股份，本來對業績可出錯的容忍好低，但偏偏市場無其他選擇。

兩大霸主難有敵手

手遊、即時通訊，買騰訊；電貿，買阿里，在可見的日子，亦見唔到內地有其他公司有能力挑戰佢哋位置，形成基金30倍、40倍甚至50倍都逼住落注。不過，講番一句公道話，係騰訊手遊今季表現差，同遊戲結構轉型，由側重輕鬆休閒遊戲轉向更多相對hard core的遊戲，睇番就算調低全年盈利預測的野村，都估第四季手遊業收入會有所回升，返回第二季水平。

古勝見識過二○○○年科網股可以有幾咁瘋狂，所以對比之下，唔夠30倍PE，其實未至於高不可攀，最後都係嗰句，在阿里開始在美國出現追貨，炒到過50倍PE之下，一係唔買，若兩害取其輕，惟有係揀番騰訊。

古勝