話就話香港零售市場下滑，內地客買少咗嘢，不過南韓護膚化妝品集團AMOREPACIFIC香港分公司董事總經理葉豐盈（Fion），就話完全感受唔到市道差，仲選擇喺呢個時候，將與集團同名嘅護膚品品牌「AMOREPACIFIC」引入香港。
佢哋依家喺香港已經有兩個品牌LANEIGE及雪花秀，絲絲啲老友都話今年零售好「濕滯」。
不過Fion話Feel唔到，佢哋今年喺港銷情遠勝預期，分別大升約50%，仲話呢個時候引入旗艦品牌係成熟時機。雖然佢話冇硬性銷售目標，絲絲見Fion信心滿滿，呢隻以草本精華為賣點嘅王牌應該幾打得。
余絲韻