渣打（02888）第三季稅前盈利插水加上官司纏身，令大小股東都唔多妥行政總裁冼博德嘅表現，頻頻傳出要拉佢落台，不過集團就依然力撐。
為咗安撫一眾投資者，冼博德都要落力救下市，早前就喺公布第三季業績嘅時候，講明下年目標要提升4億美元生產力，而呢個救亡大計，終於喺尋日舉行嘅投資者路演上正式登場。
提升生產力嘅方法離不開「瘦身」，渣打就計劃下年削減80至100間零售分行，希望可以藉此改善利潤，而呢樣只係4億救亡大計嘅其中一部分。
截至今年六月底，渣打一共有1,248間零售分行，所以呢次削減嘅分行數目，都差不多佔整體一成。
不過無計啦，渣打已經兩次捲入洗黑錢案，合共被罰9.6億美元，之後英國銀行徵費估計又要使多3.75億美元，加上已經發咗兩次盈警，真係唔瘦身唔得。
今年嘅投資者路演由尋日開始，連續三日喺香港舉行，嚟緊兩日大家就拭目以待，睇下冼博德點樣力挽狂瀾。
余絲韻