絲絲講場：本地分析師教秤公司

好公司有獎收

身為協會主席嘅鄧聲興話，好多上市公司淨係同外資行做溝通，忽視咗本地分析員，受影響嘅自然係班散戶。為了鼓勵上市公司做好投資者關係，所以就搞咗呢個獎項嘞！

佢哋話，分析上市公司除咗睇年報外，做公司訪問同樣重要。講起訪問，咁點先睇得出間公司係正貨，定係有問題？一向敢言嘅藺常念就話，「問題公司」嘅主席同分析員見面，通常講嘢梗係滔滔不絕，簡單嚟講，就係勁吹水。要拆穿佢哋？就要靠分析員嘅經驗同感覺，與科學分析無關。

近排金融市場嘅大件事，離不開滬港通同埋阿里巴巴。藺常念就話，依家滬港通搞掂咗嘞，最緊要就係唔好再失去下一隻阿里巴巴，尤其睇到阿里喺美國嘅成交咁勁，如果支付寶第日要上市，香港就千祈唔好放過嘞！絲絲就覺得行動最實際，既然係咁，協會就應該同監管機構反映一下，希望唔好再「走寶」啦！

余絲韻