啱啱喺九月底以逾25%溢價入主老恒和（02226）、成為第二大股東嘅陳志雄原來好有「背景」，佢尋日自爆當年喺國美（00493）股權爭奪戰中，以「黃光裕朋友」身份發動攻勢擊退陳曉，為創辦人黃光裕保住江山。佢笑指呢件事佢好低調，計絲絲話，好事又使咩低調呢？好似老恒和尋日有活動，佢都高調撐老恒和啦！
今年初上市嘅老恒和釀造，上市無耐就被質疑庫存同毛利率過高而遭拋售，股價亦由11元樓上碌落4.48元，近日就突然有主要股權易手，陳志雄大拿拿攞7.74億元，向主要股東買入約9,683萬股股份，每股大概8元，以老恒和尋日收報5.66元，接貨有好大溢價喎。
不過陳氏就再三強調話，公司招股價7.15元，接貨價8蚊唔算高，仲大讚老恒和品牌地位崇高，睇好未來生產路線、銷售方式，但就唔會插手公司行政、管理嘅工作。
佢仲話雖然老恒和曾受市場質疑，但自己就做晒研究，參觀晒廠房，希望8蚊嘅接貨價，兩至三年會有100%增長喎。值得留意嘅係，陳志雄較早前再認購老恒和非上市認股權證，若獲悉數行使，可增發1億股股份，佢尋日都話會再考慮增持。
余絲韻