絲絲講場：Google諗創意睇齊登月
Google被譽為「打工仔天堂」，絲絲同好多打工仔一樣，好想成為佢哋嘅一分子，絲絲早兩日終於去咗「天堂」。雖然只係參觀咋，但都大開眼界，見識呢個硅谷總部創意發源地，原來員工Free到可以帶埋寵物返工添！
度橋救世思想要激
Google畀員工空閒時「任飲任食」嘅福利，講都講到厭，今次就講吓究竟Google點度橋。你可能聽過Google研究緊無人駕駛汽車、可以傳送WiFi嘅巨型氣球甚至係智能隱形眼鏡，其實意念統統都係嚟自Google X實驗室。
實驗室從來唔會對外開放，Amanda Kelly係Google X產品經理，有份參與無人駕駛汽車項目，佢話Google X有一種好重要嘅思考方法叫「登月」思考（Moonshot Thinking），最緊要係思維要夠「激」！
「車房」實踐做乜都得
為解決世界重大問題，如點樣令全球所有人都可以上到互聯網，或者有乾淨食水，佢哋會諗一啲天馬行空嘅方法，研究突破性技術。好似佢哋當初發明無人駕駛汽車，其實係為咗解決每年全球有成百萬人死於交通意外嘅問題。
不過，淨係意念係唔夠，點樣實踐最重要，Google兩年前成立咗名為Garage「車房」實驗室，入面有齊所有軟硬件包括3D打印機及雷射切割機。
負責呢個實驗室嘅創新及創意部主管Frederik Pferdt話，只要唔係犯法嘅嘢都可以喺「車房」做，員工就算食飯吹水，甚至連寵物都可一齊帶返工！原來WiFi氣球就係員工喺「車房」諗出嚟。
余絲韻