絲絲講場：朱仔講中文語出驚人
大家都知facebook教主朱克伯格嘅太太係美籍華人Priscilla Chan，唔知係咪近水樓台嘅關係，有「私人補習」嘅朱仔周三喺清華大學發表演說時大騷「Quali」，同主持人進行咗一場全中文嘅對話，雖然少不免會有停頓同文法出錯，但朱仔嘅表現已贏得全場掌聲同驚嘆。
fb想幫中國通世界
身穿灰色短袖T恤加藍色牛仔褲嘅朱仔，同觀眾交流咗公事以至私事嘅想法。
談及中國創新方面嘅問題，朱仔認為中國有好多最創新嘅公司，透露日前同小米老闆雷軍食過飯，讚揚小米嘅產品又好又平，相信大有發展，又認為騰訊（00700）嘅微信業務做得好大，淘寶就創造咗唔少工作機會。
不過，中國到依家仍然禁用fb。對此朱仔就未有正面回應，但佢話fb已經喺中國喇，透過fb嘅廣告，協助中國企業吸納外國客戶，同時協助全球其他國家同中國聯繫。對於fb未來嘅發展，朱仔話未來十年有三大發展重點，一係連接整個世界，二係發展人工智能，三係發展虛擬實境。
普通話難學當挑戰
對於想創業嘅同學，朱仔就苦口婆心咁話，最好嘅公司都唔係因為創辦人想創業而被創立，而係因為創辦人想改變世界。
至於點解會想學中文，朱仔話自己係從一○年開始學中文，因為想同太太以及太太嘅家人溝通，仲有係因為覺得中國係一個偉大嘅國家，所以想學中文，感受吓中國魅力，而且普通話好難學，所以想挑戰吓自己。
朱仔咁識時務，難怪年紀輕輕就成功發圍。
余絲韻