年尾係結婚旺季，絲絲收到唔少紅色炸彈，最新就有「股壇小甜心」之稱嘅金英証券（香港）零售研究部副總監李韻儀（Sonija），Sonija會喺下月十五日結婚，恭喜恭喜。之後財金界又少一位單身靚女喇。
Sonija同任職傳媒嘅未婚夫拍拖三年幾，兩人係做訪問時偶然認識嘅，之後發覺同對方幾啱傾、相處融洽，就繼續發展落去喇。依家修成正果，大家梗係戥佢哋開心啦。佢未來老公係電視台財經節目主持伍嘉文，唔知佢哋平日得閒會唔會傾吓世界金融大事，又或者齊齊討論吓炒乜股呢？
Sonija會喺尖沙咀嘅酒店舉行結婚典禮，而且喺中午舉行，等大家食完自助餐仲可以慢慢傾，安排都唔錯呀！Sonija話，婚後兩人會到馬爾代夫度蜜月，先享受二人世界，造人計劃就隨緣啦！絲絲好心急睇Sonija靚靚結婚相，但Sonija話，佢哋都要到下月十四日（即婚前一日）先攞到啲相。
雖然結婚相喺香港影，但原來佢哋搵咗一隊南韓團隊影，佢哋要先將啲相傳到南韓整理，然後至傳返香港，所以一來一回就用咗唔少時間。
余絲韻