期指觀瀾：僵局未破低位整固
真係好的唔靈，昨日筆者先話美股、美債上星期的恐慌性換貨應暫告一段落，有利資金重返風險資產，主要喺股市身上，九月初選擇「獨弱」的港股，真係擺出一副唔願跟外圍股市走的姿態。
昨日恒指開高216點，以23,239點開出後，隨即見23,290點的全日高位，之後全日浸浸落，收市僅得47點升幅收報23,070點，主板成交縮減至530億元，基金買貨意欲極低，一來滬港通未有下文，加上市場對今日政府對話結果不太樂觀，使市底反彈乏力。
期指高開低收，出現一支大陰燭，即日高位在早市的23,290點，低位是尾市的23,000點，日市收23,026點，10日線23,122點即日得而復失，成交4.9萬張。
昨日期指客反攻乏力，一定令唔少好友失望，但事實期指在十月三日見22,511點之後，反彈至23,527點見短期高位，正營造一個短期三角形的姿態在低位整固。
上星期的兩個即市低位22,803點及22,785點失守前，低位整固可能仍會持續，很難太早判斷大市未見底，今日港股最大的不明朗因素，反而是收市後的政治事件發展方向，估計市況會比昨日更為僵持，一動不如一靜為宜。
John Mullen