擅於狙擊美國上市中國概念股嘅渾水研究（Muddy Waters），早年狙擊嘉漢林業觸發一場「民企風暴」，可見創辦人Carson Block眼光獨到，但原來佢一直用自己資金進行沽空。
Carson近期就考慮踩過界，搞埋對沖基金，一於同理念一致嘅投資者齊齊「搵銀」。
依家渾水員工唔夠10人，主力製作研究報告。
Carson話，如果搞對沖基金，會結合維權同長短倉投資策略，仲會側重沽空，成事嘅話會集資超過2億美元（約15.6億港元）。
至於點解會有呢個諗頭，Carson解釋，有啲企業原本係好好嘅沽空對象，但因為冇足夠堅料製作報告，只好放棄，白白錯過沽空機會，所以如果有一筆管理資金，就可以有更多資源去發揮，唔會浪費時間同機會。
令Carson聲名大噪嘅一役，當然要數幾年前狙擊嘉漢林業，導致後者股價暴瀉，最終喺一二年三月申請破產保護，仲連累「賺錢之神」普爾遜持股虧損1.05億美元。可以想像，如果Carson踩過界，市場可能又會覆雨翻雲喇！
余絲韻