八達通CEO高敏德（Kevin）上任唔夠七個月，尋日忽然話唔撈喇，理由係事業上有新發展。佢已經向公司董事局請辭，十二月一日正式離任。
八達通喺兩個月前至高調介紹Kevin畀大家認識，以為佢會大展拳腳，估唔到咁快就走。佢嘅前任，係銀行家張耀堂，絲絲記得，八達通因為一直搵唔到人，張耀堂都延長咗佢嘅Last Day。
對於高敏德唔夠七個月就辭任CEO，八達通嗰邊只係話「感到惋惜」，同埋已經展開新行政總裁嘅甄選工作。香港支付行業資深人士唔多，要喺外部請人都唔易，八達通內部唔知會唔會有人因此升職呢？
Kevin離任嘅事，八達通已經同金管局、公司董事局、管理層同埋員工溝通好，確保業務運作順利。
Kevin喺支付行業打滾足足23年，未効力八達通前喺MasterCard做咗十年有多。國際公司嘅高層好多時都要周圍飛，Kevin可能係因為咁就由MasterCard轉去八達通。
之前佢同絲絲分享：「酒店嘅床鋪唔係唔舒適，但始終唔夠屋企嘅好。」唔知今次佢嘅事業新發展，使唔使換過張床呢？
余絲韻