鄰近港鐵荃灣站有多個私人屋苑，除了名氣最響、食正荃灣線總站優勢的老牌屋苑綠楊新邨外，其實站口對開的多個上車屋苑，同樣享有港鐵之便利，加上各屋苑基座設自家商場，有行人天橋連接，並可直達港鐵站大堂及商場綠楊坊，形成自給自足的小社區，無論買嘢或搭港鐵毋須過馬路。
這些屋苑雖然樓齡較舊，康樂設施欠奉，但勝在單位夠「的骰」，向來有上車客捧場。其中，最受歡迎莫過於這帶放盤最多的荃錦中心。屋苑由兩座大廈組成，清一色兩房戶，最大特色是基座商場民生舖最多，購物、「醫肚」不假外求，而經天橋行兩步即可搭港鐵。
美聯林金葆指，現時屋苑約有15個放盤，最平為１座低層Ａ室，實用面積369方呎，業主未受「佔中」影響，叫價企硬395萬元，較綠楊新邨平一截。