受「佔中」行動影響，近期多個地區交通幾近癱瘓，大塞車不在話下，就連港鐵都「逼到爆」，上班族苦不堪言。不過，港鐵始終是最穩陣的交通工具，若然能夠家住港鐵總站附近，至少返工全程有位坐，毋須「逼餐死」。其實，一些鄰近港鐵總站的細價屋苑，不乏「上車」較Easy的選擇，想置業的打工仔不妨諗諗。
集會人士堵塞港九多線主要幹道，累及多個地區交通大混亂，特別是港島區成為塞車重災區，一些住半山區的居民，落山「閒閒哋」要一、兩粒鐘，可謂飽受塞車之苦。難怪不少平日揸開車的藝人，索性改搭港鐵。
這也凸顯港鐵在關鍵時刻的可靠性，雖然近期負荷大增，繁忙時間等幾班車都未必成功上車，逼得入車廂亦慘變「沙甸魚」，但畢竟本港鐵路網絡完善，去邊都頃刻即達，好過在路面得個「塞」字多多聲。
其實，行走市區的港鐵港島線、荃灣線及將軍澳線，其總站柴灣站、荃灣站及寶琳站附近也有細價盤選擇，不但行兩步就到站口，坐港鐵更不用「企足全程」，往中上環商業區半個鐘頭左右車程即達，上班輕輕鬆鬆。
預算有限的上車客，「平平哋」可揀鄰近柴灣站的永利中心，一房戶不足300萬元；荃灣站對開的荃錦中心亦有細價盤可揀，兩房戶395萬元起錶。至於Budget較「鬆動」，不妨放眼寶琳站上蓋屋苑新都城，大型會所、商場一應俱全，兩房戶最低消費440萬元。