絲絲講場:恒生張總跑全馬似巨星

好多人都話喺外地參加馬拉松,氣氛好過香港好多,早兩日恒生銀行(00011)傳訊及可持續發展總監張樹槐(Walter),參加完美國芝加哥全馬賽事,佢喺沿途所見嘅打氣情況,以「星級」形容亦不為過。

芝加哥馬拉松係「世界六大」之一,今次賽事吸引嚟自全球100個國家和地區約7.1萬人報名,其中4.5萬人獲參賽資格,據講芝加哥每年搞「全馬」帶嚟嘅經濟效益有成港幣20億元咁多,仲唔係「丁財兩旺」?

賽道環繞市內29個區,仲有成170萬民眾夾道打氣,有人「夾Band」助興,喺唐人街亦有華人打鼓支持,賽事當日可謂全城參與。

民眾高呼「Walter」打氣

Walter學其他跑手喺T-shirt印埋個名,邊跑邊聽到好多人激動咁高呼跑手名字,Walter就聽到:「Walter, I have been waiting for you!」、「 Walter, you are doing great!」

呢個Moment十足「粉絲」追星咁款。而喺跑手跑至終點時,大會仲會透過廣播,宣布每名跑手嘅名字以作表揚。

順道參觀布思商學院

今次係Walter完成佢喺五大洲嘅第44次全馬賽事。跑馬拉松之餘,Walter順道去月前喺香港數碼港開設分校嘅芝加哥大學布思商學院(Chicago Booth)總部參觀。

余絲韻