孖妹Ｓ檔案：投資講Trend資產也換季

美匯轉強 買股揀內銀

陳：利通證券研究分析員 陳泳欽（Eugenia）

Kitty：秋風送爽，睇嚟好快又換季喇！到時可以將有型有款嘅冷衫同大褸着晒上身，食幾多都唔怕啲贅肉「見光死」！Eugenia，你返工都着得好大路噃，全身黑色。

陳泳欽換季Tips

葉文炘（Abbie）

陳：都係工作關係啫，其實我最愛嘅顏色係紫色同紅色。冬天時，就會買返多啲深色系嘅衣物，我鍾意着皮褸同冷織長褸，仲會襯番對Boots，有型啲吖嘛！

葉文炘換季Tips	梁子琪（Eva）	梁子琪換季Tips

彩兒：我知你以前睇開基金，依家就主力分析股票，不如教吓大家點調整投資組合吖。

陳：美聯儲停止買債在即，全球將進入加息周期，我認為加息係復甦訊號，對股市有支撐。市場憧憬內地四中全會將推出利好政策，以及預計滬港通可如期十月通車，兩者都利好港股。

不過，港股易受外圍影響，加上美匯近日轉強，我對零售股、濠賭股及一眾油股、金礦股較審慎，惟獨睇好內銀股。內銀過去五年嘅營業收入穩步增長，獲批准發行優先股可助提升資本充足率，而近期放寬樓市限購令亦有助釋放貸款。預期上述行業基本因素會持續，兼且中央或再有政策支持，所以內銀增長潛力大，有機會「追落後」。

大中華市場估值合理

彩兒：如果中央繼續推動資本市場及行業改革，睇嚟國策股仲「有運行」。

陳：無錯。基金方面，我睇好大中華市場，因為PE較合理。歐洲去年升咗好多，其他新興市場資金流就會受美元升勢影響，所以兩個市場都要剔出投資組合。

Kitty： Eugenia，聽聞你剛剛成為人妻，老公仲送咗對靚靚嘅Christian Louboutin「紅底鞋」畀你，真係羨煞旁人，祝你新婚快樂！

買A股ETF迎接「通車」

葉：大和認股證聯席董事 葉文炘（Abbie）

Kitty： 喺投資市場，你實有心水，咁你又諗好今年冬季嘅心水打扮未？

葉：我仲未開始換季啊，通常都係等到真正需要着冬天衫時先會去買，而且我鍾意親自逛吓銅鑼灣或尖沙咀嘅小店，搵返啲舒服又特別嘅衣物。以前傾向日、韓打扮，但依家都會留意吓歐美style。去到冬天，無論着裙定着褲，我都會把握機會着Boots，冬天先有機會着！另外，我會盡量保持身上嘅顏色唔多過兩種，反而會將重點放喺飾物上，好似耳環、項鏈、心口針等。

彩兒：等咗六個月，滬港通好快推出喇！我長氣啲再問多次，點先可以捕捉最後嘅投資機會？

　葉： 港交所（00388）係最直接受惠嘅股份，因為佢嘅市場地位及業務性質夠獨特，其次都睇好騰訊（00700）、中移（00941）以及A股ETF南方A50（02822）與安碩A50（02823）。今年港股大上大落難捉摸，我建議散戶落場實戰時要做好預期管理，加上港股現時開始回穩，喺回穩初期仍會反覆，所以投資者可以先小注投資。

內地有空間放寬幣策

Kitty：世界銀行上周下調中國今年GDP增長至7.4%，會唔會影響內地市場嘅投資價值？

葉：若美國加息，內地反而有空間放寬貨幣政策，令資金流動性繼續改善。另外，如果因為加息而令資金從美國調走，相信都好大機會流入中、港股市，況且A股近年表現確實大幅落後，所以我中長線較睇好A股。

後QE時代債轉股應對

梁：康宏理財聯席董事 梁子琪（Eva）

彩兒：美國即將退出量寬，投資者嘅股債資產應該點配置？

梁：當美國加息，債券價格及息率回報將有下調，所以預期資金將由債市轉投股市。環觀全球市場，歐洲似乎大勢已去，相反美國近日經濟數據明顯改善，所以中長線睇好。我建議進取型投資者可將全部資金投放股市，當中，美股佔比為五成或更高，亦建議可買個別大型藍籌股，以生物科技板塊為首選。

其次就睇好中、港股市，因受惠滬港通推出。A、H股仍有差價，可買入相關股份。港股近日嘅調整，都係受政治因素影響居多，相信港股年內仍有上升空間，而四中全會亦係市場焦點。

增持人民幣 避揸商品

Kitty：人民幣近月轉強，係咪都可以趁機增持？

梁：估計人民幣年內會喺相若水平徘徊，增加人民幣定存都不失為穩健策略。但商品市場就要盡量避免，因為黃金、石油價格喺近日緊張局勢下不升反跌，情況怪異。

彩兒：Eva，睇嚟你呢排都係忙住幫客戶嘅投資組合「換季」，無時間去行街街。

梁：係啊。不過我睇潮流雜誌話，今年興番啲線條簡單、平實為主嘅打扮，同我本身走嘅路線好一致。冬季我鍾意着冷、絨質料嘅衣物，以前鍾意着黑、白、灰，但近年都開始接受其他顏色，可能會買返啲粉色系嘅中褸或者連身裙。

Kitty：你咁忙，我建議不如喺促銷季節同啲姊妹去血拼，一次過買晒鍾意嘅衫啦！

梁：都係「分散投資」好啲，而且每次買衫時我都會諗，如果可以將啲錢拎去買某隻基金收息，賺到嘅息再用嚟買衫，咁咪仲好，又可以保住我嘅本金！

彩兒 Kitty

若有料報畀彩兒同Kitty或有嘢問，可電郵money.biz@on.cc