孖妹S檔案：日樓專家 長揸股票

彩兒：你近三年發展日本房產中介生意，開咗JP Housing，做埋董事總經理。熟咗日本市場之後仲炒埋日股添喎！

李：舊年三、四月日本政府推行量寬，令日圓逐漸貶值，吸引熱錢流入，所以就喺自己較熟悉嘅建設、房地產同房地產中介等板塊加注投資，我只會投資自己熟悉嘅股份，而其他在港知名度較高嘅消費股，好似UNIQLO母公司Fast Retailing（日股：9983）同Sony（日股：6758）等都唔會掂。

我經常喺東京四出睇樓，幾了解當地地產商建屋質素，所以主打投資質優嘅公司，例如積水房屋（日股：1928）、鹿島建設（日股：1812），亦曾投資三井不動產（日股：8801）等日經成分股。

Kitty：之不過，日經指數一九八九年底曾高見38,957點，之後日本樓市同股市泡沫先後爆破，股市經歷二十四年動盪仲未返家鄉，你唔驚……

李：其實最初投資日股嗰陣都有戒心，但係當時有個喺日本證券行做嘢嘅朋友話我知，當地政府事後嚴控股市泡沫，而且上市要求嚴謹，係亞洲最健全市場之一，經深入了解先入市。我舊年投資日股嘅回報率約20%，今年年內就有10%左右。

目前日股佔資產組合約8%，有分散風險嘅作用，因為太忙，我每周只可以抽空審視同調整投資部署一至兩次，主力長線投資。鑑於抱住日圓持續弱勢、而日經尚有上升空間嘅預期，所以我經常用日經期指長倉對沖風險o架！

建設股回報夠「靚仔」

彩兒：日本量寬政策，再加二○二○年嘅東京奧運效應，東京啲「磚頭」可能會逐步升呀！

李：所以我咪更加睇好日本建設股同地產股。其中，積水房屋為我去年至今帶嚟約40%累計回報，算係「愛股」，除回報靚仔之外，鍾情呢隻股或者係因為以前去日本留學時住過佢起嘅樓，有情意結囉，哈哈！

Kitty：你「唔熟唔食」，一定贏開巷啦。

李：都唔係o架！之前我投資過大型發展商野村不動產（日股：3231），雖然股份舊年爆升44%，但年內就跌20%，最終平手出貨，明顯係功課做得唔夠，忽略大市同其他因素對其影響，我從中吸取教訓。

彩兒：你○三年辭工留學日本，又識日文，做功課炒日股實「Easy執」啦！

李：我習慣睇《讀賣新聞》同《日經新聞》日文版。其實安倍政府政策、歐美市場，甚至中日政局等因素都會牽動日股走勢，所以留意當地新聞係必做嘅功課。舉例，日本政府推出針對旅客嘅新退稅措施，擴大至藥物及消費品等，就有機會刺激相關股份走勢喇！

Kitty、彩兒

若有料報畀彩兒同Kitty或有嘢問，可電郵money.biz@on.cc