孖妹S檔案：星級散戶 炒出瀛利

日本「海歸」洞悉股匯

黎：散戶黎安誠

Kitty：你八十年代中去日本留學，學生時期就開始炒日股，依家係添福投資董事長資深助理，幫公司主力發掘同投資日股，可能你炒股仲多過我食飯啊！

黎：我當時遇上「黑色星期五」全球股市暴跌，見證住日股出現世紀大泡沫，繼而泡沫爆破，走入迷失二十年。泡沫後嘅日本市場傾向簡單，近八成投資者來自日本本土，仲主要係機構性投資者，所以無咁受外來事件短期影響。另外，日圓與日股嘅關係非常密切，日圓下跌有助解決通縮問題及振興國內經濟，日股按道理必然上揚。

我認為，領漲行業先會係出口相關企業，其後係金融投資板塊，最終因經濟景氣好轉，業績受推動嘅內需股就會受惠，如果按以上流程沽日圓、買日股，回報就可以倍升。

彩兒：今個月十九號，日經指數創七年新高，而日圓就見六年新低，你咪「食盡兩家茶禮」？

黎：日股舊年升幅係亞洲之最，達56.72%，以同步沽日圓嘅策略投資日本股市，回報率可超過65%，不過就發達國家嚟講，呢個增長率好難延續。我諗日圓匯價仲會不斷跌，迎接過去二十年最大跌幅，而日股就會迎接泡沫破滅後最大嘅牛市，估計今、明兩年沽日圓買日股嘅平均回報率或者可達25至30%。

Kitty：我知你最鍾意就係同小型股拍散拖，嘻嘻！

黎：日本內閣近期允許日本政府養老投資基金（GPIF）增加股票持倉，勢增加股市資金流，相信當地中至大型股會受惠先，喺資金流轉下亦有望帶挈小型股。因為小型股多啲散戶參與買賣，交投活躍啲，所以我最鍾意短炒相關績優股。

睇《四季報》揀小型股

彩兒：咁你有乜揀股必殺技先？

黎：我會參考日本每季出版一次嘅《會社四季報》，書中輯錄上市公司嘅財務報表同情報，係我嘅投資天書嚟！我特別會揀一啲盈利增長強勁、預期有持續性增長、成交活躍嘅小型股。

Kitty：日經指數走勢反覆，年內跌0.38%，入市都幾考功夫。

黎：我近期部署借日圓、投資主營窗簾業務嘅五洋Intex（日股：7519），主因以資產作抵押來借日圓嘅年息僅1至2厘，可做套息交易，而該公司去年開發擁全球專利嘅環保節能窗簾，力爭捕捉東京奧運機遇，目前我喺五洋身上嘅投資回報約一成，目標賺逾兩倍。

Kitty、彩兒

若有料報畀彩兒同Kitty或有嘢問，可電郵money.biz@on.cc