絲絲講場：錢乃驥：CEO 似玩雜耍
尋日一大班Banker聚首一堂出席銀行學會（HKIB）年會，當中包括華僑銀行行政總裁錢乃驥（Samuel），佢闊別香港銀行界七年，依家成功買咗永亨（00302），永亨主席馮鈺斌（Patrick）邀請佢嚟年會，分享吓點做一位成功嘅CEO。
話說Samuel係「香港仔」一名，未去新加坡華僑銀行揸Fit前，喺美銀亞洲同建行亞洲做咗十幾年CEO，○七年佢離港嗰陣，都仲係銀行學會主席，帶領銀行代表團上南京同內地大行簽合作備忘錄。後來就由永亨主席馮鈺斌（Patrick）接任。
闊別七年載譽歸來
世事難料，七年後華僑收購永亨，Samuel亦因此回歸香港銀行界，連佢自己都話完全冇諗過會發生，今次好開心又可以返銀行學會同一眾行家見面。
Samuel做CEO經驗十足，佢形容依家做CEO要好似玩雜耍咁，同一時間兼顧好多嘢：除咗經營有道，幫銀行賺大錢外，仲要滿足客戶、股東、員工對銀行嘅期望，令社會各界對銀行有信心。
永亨十月正式改名，絲絲今日見到銀行外面已經圍晒板準備就緒，大家好快就可以喺街頭見到「華僑永亨銀行」招牌同埋個新Logo。
余絲韻