阿里巴巴上市後，主席馬雲嘅身家即刻有數得計。喺彭博社嘅富豪榜上，馬雲由阿里巴巴上市嗰日開始，排名已升至亞洲第二。胡潤百富榜尋日放榜，馬雲即刻稱霸，估計佢家族有1,500億元人仔，順利成為排名榜成立16年以嚟，第11個中國首富。今年就有個「IT現象」，前10名有一半都係IT界人物，送走地產大富翁。
IT科網發達帶挈IT巨子身家暴漲，新上榜嘅前10名有一半都係IT界，包括馬雲、漢能太陽能（00566）主席李河君、京東老闆劉強東、小米老闆雷軍。
相反，十大富豪中，地產界就由6個減剩2個，跌出十大嘅包括有碧桂園（02007）嘅大股東楊惠妍同恒大地產（03333）主席許家印。錢多自然「粉絲」多，十大富豪有7個微博粉絲數量排頭廿名。
馬雲家族估計身家有1,500億元人仔，一年內升價5倍。屬於內房類別嘅大連萬達大股東王健林家族就「輸個馬鼻」，少馬雲家族50億屈居第二。令人驚喜嘅就係，第三位係以投資太陽能致富嘅李河君。
余絲韻