絲絲講場：首富威風背後靠男人
成功男人背後嘅人，唔一定係女人，世界首富比爾蓋茨背後除咗有佢嘅妻子之外，仲有Michael Larson呢位男士。兩人合作超過廿年，多得Larson，蓋茨至可以做咁多善事、有咁多錢使。
Larson淨係服侍蓋茨
Larson真實身份係基金經理，蓋茨本來身家只係得50億美元，喺Larson嘅管理之下，已經滾到820億美元。絲絲都想搵Larson搞搞自己嘅儲蓄，唔駛賺15倍咁多，兩、三倍都心滿意足。
不過，大家都係「葡萄吓」好喇……點解？Larson嘅公司叫做Cascade Investment LLC，所有嘅投資資金都係來自蓋茨嘅，換言之，呢間公司淨係服侍蓋茨。
基金低調 資訊密實
Cascade雖然好威，但公司極低調，就連位於西雅圖嘅辦公室都係一棟冇標示嘅建築物，員工數量更只係得100人左右。
此外，Larson本人好少喺媒體曝光，佢亦要求員工守口如瓶，仲要簽保密協議。即使蓋茨係四季酒店嘅大股東，Cascade高層出差嘅時候，都唔可以入住四季，咁樣既唔張揚，又可以慳錢。
連公司員工都管得咁嚴，唔浪費蓋茨嘅一分一毫，唔怪得Larson有「蓋茨的看門人」呢個稱號喇！
余絲韻