孖妹Ｓ檔案：十月「估」災 淡友兩睇

冧市機會率達到7成？

史：金榮財富管理董事總經理兼首席基金經理 史理生

彩兒：八七年股災、九七年亞洲金融風暴，仲有○八年金融海嘯都喺十月發生。雖然今年十月滬港通或通車，但未到十月港股已經變得好難捉摸，先創出年內新高，轉頭又連跌8日，唔通今年「十月股災」真係走唔甩？○○年你因為喺科網股災出現前勸人沽科網股而被冠名「熊潮瘋」，今次你又點睇？

過去廿年港美股九、十月走勢

○八年至今的VIX指數走勢

史：我相信個市九月初已經見頂，港股中期升浪暫告一段落，並已經進入下跌周期，有反彈、無上升。我估計今年十月出現大跌市嘅機率都有七成，而且會係由外國勢力有計劃展開嘅掠奪戰，就好似當年亞洲金融風暴咁。

Kitty： 七成機率好高喎，何以見得？

史：港股大升至25,317.95點當日（九月三日），期指未平倉合約總數突然急增近5,000張；但以技術分析嚟睇，其實港股當日突破利好，理應可升高啲，點知翌日（九月四日）就掉頭下跌，明顯係大戶出手壓低個市。國際評級機構穆迪之後又發表報告，指本港政治爭拗持續係市場利淡因素。我個人分析，大戶好似不約而同咁藉「佔中」嚟睇淡股市。

阿里炒完 資金恐退潮

彩兒： 但滬港通會喺十月推出喎，加上阿里巴巴集團（美股：BABA）上市帶動美股升浪，喺咁嘅市場氣氛下，你都睇得咁淡？

史：滬港通絕對係中長線利好因素，唔排除未來會帶動港股進入新一輪牛市，但呢個消息已經炒咗幾個月，即使推出時或令港股稍有反彈，但仍然好難扭轉短期跌勢。其實美股近期真係升得好急，要小心啲，尤其當有阿里巴巴呢啲咁大型嘅新股上市。市場高潮過後，資金好可能會迅速撤離或避險。

Kitty：九七年亞洲金融風暴時，港股十月單月跌幅接近三成，你預計今次會唔會好似當年咁傷？

史：我只可以話，九、十月處於動盪周期，投資者應該要有戒心。引述一句外語：When you doubt, stay out（當你有懷疑時，最好不要入市）。

恒指失23800先驚未遲

羅：交銀香港首席經濟及策略師 羅家聰

彩兒：諾貝爾經濟學獎得主席勒（Robert Shiller）早前話美股已經出現崩盤先兆，「末日博士」麥嘉華（Marc Faber）亦繼續唱淡美股，唔知港版「末日博士」你對股市又有何高見？

挾高兩成才有條件冧

羅：美股兩大指數依家嘅市盈率其實同歷史平均水平相若，只有16至18倍，過往出現金融危機時，市盈率最起碼都20倍以上啦。席勒所講嘅周期調整市盈率（CAPE）本身就偏高，佢只可以用嚟反映市場貴唔貴，但同大市升跌關係就唔大。近日美股升勢明顯係由科技股帶動，因為蘋果公司推出新產品及阿里巴巴喺紐交所上市，但睇番納指目前嘅市盈率都唔算高。

Kitty：不如講番大家最關心嘅港股啦，睇嚟你唔係好擔心會有「十月股災」！

　羅： 今年「十月股災」機會好微喎，以圖表分析，應該明年初先大跌市，況且股災都唔一定喺十月發生啦！雖然恒指九月初升至高位，但應該未咁快見頂。我認為個市啱啱先開始升，跌番落嚟，係因為之前升得太急，要調整吓啫，跌穿23,800點先驚都未遲。跌到23,800至24,000點左右，再挾高番兩成啦，到時就有條件出現股災。

彩兒：股災出現前仲會有咩現象？等股民留意吓，有個心理準備都好。

羅：當無人再睇淡個市，大家聽「股災」兩個字聽到厭，同埋好似○七年咁 ，一打開報紙就見到好多投資講座時，咁通常股災就「嚟真」喇！因為升市嘅上半場通常都係啲「聰明錢」，下半場先輪到散戶入市，所以投資講座會多咗。

散戶歷盡三場股災 平常心面對

八七及九七年股災時，孖妹年紀尚輕，到○八年金融海嘯先真正感受到跌市嘅震撼。禢先生投資近三十年，經歷過晒三場大型股災，雖然投資穩健，每次都無乜損失，但提起六年前嘅金融海嘯，都難免猶有餘悸。

「正所謂『先叫你瘋狂，後叫你死亡』。當年股災真係嚟得好突然，一夜間好多人損失慘重。最傷就係買窩輪、牛熊嗰啲，好似我有啲朋友都全軍覆沒、焦頭爛額，當時要被迫不問價離場。」

佢又話，「當時市場氣氛好差，連滙豐咁大間外資銀行都受牽連，你就知（情況）幾嚴重啦。唔少證券行都有受影響，海嘯初期少咗好多散戶落去睇市。」

冧市增持長實滙控

不過，禢先生信奉價值投資，所以當年亦唔怕喺大冧市時增持長實（00001）、滙控（00005）等重磅股；即使股災今年真係出現，佢都話會以平常心面對，因為佢相信「買股就好似跑馬拉松咁，路遙知馬力，投資優質藍籌股長遠先可以取勝」。

歷年十月 港美股升多跌少

雖然三次大型股災都喺十月出現，但過去三十年間，股災出現比率僅一成。

統計過去二十年十月大市走勢，美股及港股都係升多跌少，跌市機率分別只有30%及25%。

若再深入分析九、十月連續兩個月嘅股市走勢，美、港兩地都以「連升兩月」及「先跌後升」嘅出現機率佔大比數，且自○九年起，其實兩大股市嘅十月都以升市為主，所以用統計角度嚟睇，「十月股災」似乎未有數據支持。

反映投資者避險情緒、俗稱「恐慌指數」嘅VIX指數，喺○八年金融海嘯及一一年歐債危機大跌市時，分別曾飆升至逾80點及逾40點；而喺九七年亞洲金融風暴時，指數亦高見近50點。

「恐慌指數」尚未恐慌

一般而言，恐慌指數低於20代表過度樂觀，高於30則過度看淡。但依家嘅VIX僅徘徊喺12至13點，係近7年嘅低水平。若以此作為指標，「十月股災」彷彿未成氣候。

彩兒 Kitty

若有料報畀彩兒同Kitty或有嘢問，可電郵money.biz@on.cc